Մետաղապլաստե, ալյումինե և փայտե պատուհանների համեմատություն

Ճարտարապետները ցանկացած պատուհան անվանում են «շենքի կիսաթափանցիկ ծրար»՝ ընդգծելով, որ այն ոչ միայն նախատեսված է բնական լույս ներթափանցելու հիմնական գործառույթը կատարելու համար, այլև պատի մի մասն է, որը բաժանում է սենյակը արտաքին աշխարհից: 

Հետևաբար, պատուհան ընտրելիս պետք է հասկանալ, որ բացի արտաքին տեսքից դրանց վստահված են նաև որոշակի պաշտպանիչ «պարտականություններ»՝ նվազեցնել ջերմության կորուստը և փողոցային աղմուկը, խոչընդոտ հանդիսանալ քամու, ցրտի և խոնավության ներթափանցման համար, երբեմն էլ կանխել չարտոնված անձանց անցանկալի մուտքը տուն: 

Եթե սահմանենք լավ պատուհանի ունիվերսալ սահմանում, այն պետք է լինի հեշտ օգտագործման մեջ, հեշտ սպասարկվող և ունենա երկար շահագործման ժամկետ: Եվ, իհարկե, հաճելի է, երբ այն գրավիչ տեսք ունի ինչպես ներսից, այնպես էլ դրսից: 

Այս հոդվածը կենտրոնացած է երեք ամենատարածված տեսակի պատուհանների՝ մետաղապլաստե, ալյումինե և փայտե տարբերակների համեմատության վրա։ Պատուհանների առավել լայն անդրադարձին կարող եք ծանոթանալ այստեղ։

Երբ խոսում են պատուհանի տեսակներից, սովորաբար նկատի ունեն շրջանակի և շրջանակի պրոֆիլի նյութն ու ձևը, լուսային բացվածքը ապակիով լցնելու եղանակը, միջադիրների դիրքը և կցամասերը։ 

Որպես սկիզբ՝ մի փոքր կանգ առնենք պրոֆիլների վրա: Նյութերը, որոնցով պատրաստում են պատուհանները, գլխավորապես երեքն են։ 

Մետաղապլաստե Պատուհանների Առավելություններն ու Թերությունները

Մետաղապլաստե պատուհանները ներկայումս ամենատարածված պատուհաններից են: Ինչու՞ են պլաստիկե պատուհաններն այդքան գրավիչ և հարմարավետ: 

Նախ՝ դրանք առավել մատչելի են, ունեն ձայնամեկուսիչ և ջերմամեկուսիչ հատկություն: Բացի այդ մաքրելու համար երկար ժամանակ չեն պահանջում և բավականին գեղեցիկ տեսք են հաղորդում թե’ բնակարաններին, թե’ ամառանոցներին:

Առավելություններ

Թեթևություն, ամրություն, կեղտին դիմադրելու կարողություն, խոնավադիմացկունություն

Մաշվածության նկատմամբ կայունություն․ չեն «խեղճանում» նույնիսկ ամենաանբարենպաստ կլիմայական պայմաններում

Չեն փչանում ուժեղ տեղումների, անձրևի ժամանակ

Ամենամատչելի տարբերակներից են

Ունեն էսթետիկ տեսք

Հերմետիկ են փակվում և դյուրին են շահագործման մեջ

Պլաստիկն իր սկզբնական տեսքը պահպանելու համար մշտական ​​ուշադրություն և խնամք չի պահանջում

Անվնաս են առողջության համար

Ունեն բարձր դիմադրողականություն մեխանիկական ազդեցություններին. դժվար է վնասել մետաղապլաստե պրոֆիլը

Բոլոր տեսակի համալրող դետալների առկայությունը (պատուհանագոգերի, պաշտպանիչ ցանցերի) մեծացնում է նման պատուհանների շահագործման հարմարավետության մակարդակը

Մետաղապլաստե պատուհանները ունեն ավելի բարձր էներգոարդյունավետություն, քան փայտի կամ ալյումինի այլընտրանքները, այդ պատճառով  բնակարանի ջեռուցման համար ավելի քիչ գումար կվճարեք

Թերություններ

Շահագործման ժամկետն ավելի կարճ է՝ ի տարբերություն փայտե և ալյումինե պատուհանների

Դիզայներական լուծումները համեմատաբար ավելի քիչ են

Մետաղապլաստե պատուհանները չեն «շնչում»:  Հետևաբար, դուք ստիպված կլինեք լրացուցիչ հոգ տանել սենյակի լավ օդափոխության մասին

Մետաղապլաստե պրոֆիլները գործնականում ենթակա չեն վերանորոգման: Եթե ​​լուրջ վնասվածք կա, ապա, ամենայն հավանականությամբ, ամբողջ կառույցը պետք է փոխարինվի

Մետաղապլաստն ունի էլեկտրաստատիկ հատկություններ, ինչը հանգեցնում է փոշու և կեղտի մշտական ​​ձգմանը դեպի մակերես: Այո, այն մաքրելը բավականին պարզ է, բայց դրա կարիքը կարող է առաջանալ բավականին հաճախ

Մետաղապլաստե  պատուհաններին բնորոշ է ջերմային դեֆորմացիան: Շոգ եղանակին կառուցվածքն ընդարձակվում է, ցուրտ եղանակին, ընդհակառակը, սեղմվում է։ Սա կարող է առաջացնել պատուհանը շրջապատող մակերեսների վրա ճաքերի առաջացման, ընդհուպ ճեղքերի առաջացման պատուհանի շրջանակի և սենյակի պատերի հպման վայրերում

Ալյումինե Պատուհանների Առավելություններն ու Թերությունները

Ալյումինե շրջանակով պատուհաններն ունեն ժամանակակից և մինիմալիստական տեսք: Ալյումինն օգտագործվում է մետաղական և կոմպոզիտային պրոֆիլներ արտադրելու համար՝ բնակելի և ոչ բնակելի տարածքների ապակեպատման համար: 

Այս նյութից պատրաստված շրջանակները ամուր են, դիմացկուն են քամու նկատմամբ և բարդ են կոտրելով բացելու համար, օրինակ, կողոպտիչների կողմից: 

Ալյումինը հարմար է պատուհանների բարդ կոնստրուկցիաների արտադրության համար: Հատկապես ստանդարտ չափսերից ավելի լայն պատուհանների համար ալյումինը խորհուրդ է տրվում մասնագետների կողմից։ Ինչու՞։ Որովհետև այլ՝ առավել թեթև նյութերը, ինչպիսին է պլաստիկը, կարող են չդիմանալ որպես լայն ապակու շրջանակ, հեշտ ծռվել կամ դեֆորմացվել ծանրությունից, քամուց և այլ գործոններից։

Ալյումինե պատուհանների բազմազանությունը թույլ է տալիս դրանք բաժանել տեսակների` ըստ ջերմամեկուսացման, ըստ բացման սկզբունքի, ըստ դիզայնի: 

Ջերմային պաշտպանությունը, աղմուկի կլանումը և շահագործման այլ հատկությունները կախված են ալյումինե պատուհանների ապակեպատման ճիշտ ընտրությունից: Այս համեմատաբար թեթև կոնստրուկցիաները հարմար են մեծ տարածքների ապակեպատման համար, ինչով պայմանավորված է դրանց օգտագործումը ճակատային ապակեպատման համար: 

Ալյումինե պատուհանները լայն տարածում են գտել առևտրի, արտադրական և համայնքային պատկանելության օբյեկտներում: 

Առավելություններ

Ալյումինը թեթև և դիմացկուն մետաղ է, ինչը թույլ է տալիս նվազեցնել ծանրաբեռնվածությունը և օգտագործել ավելի բարակ պրոֆիլներ ավելի մեծ կառուցվածքներ ստեղծելու համար

Ալյումինե պատուհանները  շատ դիմացկուն տարբերակ են, որը կարող է շահագործվել  մինչև հարյուր տարի, իհարկե, շահագործման բոլոր կանոնների պահպանման  դեպքում

Ալյումինը չի պահանջում պաշտպանություն խոնավությունից, արևի ազդեցությունից, ջերմաստիճանի փոփոխություններից կամ վնասատուներից

Այս նյութը վերամշակելի է

Միայն ալյումինե պրոֆիլներն են հնարավորություն տալիս ապակեպատել ամբողջական ֆասադներ՝ առանց վախենալու, որ կոնստրուկցիան կարող է փլուզվել ճարտարապետական կառույցի ծանրության տակ

Առկա է ձևերի ընտրության լայն տեսականի, ինչը զգալիորեն ավելի քիչ է պլաստիկե և փայտե պատուհանների դեպքում

Թերություններ

Ալյումինե պատուհաններն ավելի թանկ են, քան դրանց այլընտրանքները

Ձայնամեկուսիչ և ջերմամեկուսիչ հատկությունների հարցում զիջում են պլաստմասե և փայտե պատուհաններին 

Փայտե Պատուհանների Առավելություններն ու Թերությունները

Սոճու, կաղնու և կվենու փայտանյութերը ամենատարածվածն են փայտե պատուհանների պատրաստման ժամանակ: Դրանցից յուրաքանչյուրն ունի իր առանձնահատկությունները: 

Գովազդներում երբեմն պնդում են, որ «փայտը շնչում է», և դա ենթադրաբար հարմարավետություն է ստեղծում սենյակում նույնիսկ առանց օդափոխության: 

Իրականում, նման «շնչառությունը» կապ չունի օդափոխության հետ և վնասակար երևույթ է ջրի գոլորշիների կլանման և կառուցատարրերի փքման հետ կապված։

Տարածված կարծիք կա, որ փայտե պատուհաններն ավելի լավն են, քանի որ նախկինում, երբ մարդիկ շատ են օգտագործել նման պատուհաններ, օդափոխության հետ կապված խնդիրներ չեն եղել։ Սակայն հին փայտե ատաղձագործությամբ մաքուր օդը թափանցում էր ոչ թե փայտե շրջանակների, այլ նրանցում գոյութուն ունեցող ճեղքերի միջով։ Այսօր, երբ փայտն առավել լավ է մշակվում և հնարավոր է լինում նվազեցնել նման ճեղքերի քանակը, ակտիվ օդափոխության հարցը փայտի պատուհանների հետ նույնպես արդիական է։

Ինժեներական տեսանկյունից փայտը բարձր է գնահատվում. այն տաք և դիմացկուն նյութ է։ Դիզայնի տեսանկյունից փայտը ենթագիտակցական մակարդակում ընկալվում է որպես բնական, էկոլոգիապես մաքուր, բնական նյութ։ Իսկ թանկարժեք փայտի ցեղատեսակները ինտերիերին ավելացնում են հեղինակության և էլիտարության տարր: 

Բայց եթե խոսենք եղանակային պայմանների նկատմամբ դիմադրողականության մասին, ապա փայտը խնդրահարույց նյութ է, որը պահանջում է մշտական ​​ուշադրություն և արտաքինից ներկի շերտի պարբերական վերականգնում:

Առավելություններ

Փայտը լիովին բնական, էկոլոգիապես մաքուր նյութ է

Գերազանց ձայնային և ջերմամեկուսիչ հատկություններ ունի, ապահովում է մաքուր օդի թափանցելիություն

Ցածր ջերմային հաղորդունակություն ունի, հետևաբար՝ ջերմության կորստի նվազագույն գործակից

Ի տարբերություն մետաղապլաստե պատուհանների՝ փայտե պատուհանները հնարավոր է մասամբ վերանորոգել

Երկարաժամկետ օգտագործելի է (նշենք, որ պլաստիկե պատուհանների շահագործման ժամկետը մոտ 30 տարի է)

Փայտե պատուհանները նորաձև ու հարմարավետ են

Փայտե պատուհանների շրջանակների և պրոֆիլների մակերեսները ի սկզբանե գեղեցիկ արտաքին տեսք ունեն

Թերություններ

Ծանր շրջանակ

Արտադրության համար ծախսվող երկար  ժամանակ

Փայտը, նույնիսկ մշակված հակահրդեհային միջոցներով, միևնույն է ենթակա է այրման

Բարձրորակ փայտե պատուհանը, օրինակ, կաղնու փայտից,  շատ ավելի թանկ է, քան նմանատիպ պարամետրերով մետաղապլաստե պատուհանը

Փայտե պատուհանի տարրերը պետք է պաշտպանված լինեն տարբեր վնասատուներից: Սովորաբար դա արվում է անմիջապես գործարանում, սակայն մակերեսը պետք է պարբերաբար մշակվի

Ամփոփում

Շուկայում առկա պատուհանների առավել տարածված երեք տեսակների՝  փայտե, ալյումինե և մետաղապլաստե տարբերակների համեմատությունը բարդ է։ Այս երեք նյութերն էլ ստացել են հայտնիություն պրակտիկայում իրենց ունեցած մի շարք առավելությունների հիման վրա։ 

Այնպես որ ընտրությունը մեծապես կախված է տան ընդհանուր ոճից, տանտիրոջ նախընտրություններից, եղանակային պայմաններից, և այլն։ 

Մեծ հաշվով՝ չկա ճիշտ կամ սխալ, լավ կամ վատ տարբերակ այս համեմատության մեջ։ Կա միայն մեկ կարևոր հարց. ո՞ր պատուհանն է առավել համապատասխան Ձեր անձնական տարբերակում։