Տան պատուհանների տեսակը, քանակը, չափսերն ու տեղակայվածությունը մեծ դեր են խաղում տարածքի հարմարավետության հարցում։ Պատուհանների ճիշտ ընտրությունը օգնում է ստանալ գրագետ բնական լուսավորություն և օդափոխանակություն, ինչի արդյունքում տան տարածքը դառնում է առավել գրավիչ, կոկիկ ու հարմար։
Այս բլոգում առանձնացված են պատուհանների մի քանի հիմնական տեսակներ՝ կախված ինչպես տան առանձնահատկություններից, այնպես էլ տանտիրոջ ընտրած ոճից։
Պատուհանների Տեսակներն Ըստ Նյութերի Տեսակների
Քանի որ շուկան հագեցած է ալյումինե, փայտե, պլաստիկ և այլ նյութերից պատրաստված պատուհաններով, հարկ ենք համարում սկսել դասակարգումը պատուհանների պատրաստման համար օգտագործվող հիմնական նյութերի քննարկումից։
Ալյումինե Պատուհաններ
Առհասարակ, ալյումինե պատուհանները համարվում են առավել դիմացկուն, քան փայտե պատուհանները։ Օրինակ՝ ալյումինն ավելի դիմացկուն է անձրևի, ուժեղ քամու կամ ուլտրամանուշակագույն ճառագայնթերի նկատմամբ՝ փայտի համեմատ։ Մետաղական կոնստրուկցիայի շնորհիվ, այս նյութից պատրաստված պատուհանն առավել երկարակյաց է։ Միաժամանակ՝ ալյումինն ամենաթեթև ու ճկվող մետաղի տեսակներից է, ինչը թույլ է տալիս հեշտությամբ հարմարացնել այն տարբեր պատուհանների պրոֆիլների։
Սակայն ալյումինն ունի մեկ խոշոր թերություն. այն բավականաչափ չի կարողանում իզոլացնել ներսի տարածքի տաքությունն արտաքին միջավայրից։ Ցուրտ կլիմաների համար այս պատուհանն ընդհանրապես հարմար չէ, քանի որ այն տանից դուրս է հանում տաքությունը՝ ստիպելով տանտիրոջն առավել շատ էլէկտրաէներգիա ծախսել տան տաքացման համար։
Այսպիսով, ալյումինե պատուհաններն առավել հարմար են հիմնականում տաք կլիմայով երկրների համար։
Պողպատե Պատուհաններ
Շուկայում առկա ամենաթանկ ու ծանր մետաղներից պատրաստված պողպատե պատուհանները նաև ամենավստահելին ու ապահովն են։ Դրանք շատ ամուր են, բարդ են կոտրելու, դրսից բացելու համար։ Նաև, ի տարբերություն ալյումինի, պողպատե պատուհանները հրաշալի են տարածքի ներսի ջերմաստիճանը պահելու հարցում։
Այսպիսի պատուհանները նաև ունեն մոդեռն ու գեղեցիկ տեսք, և սովորաբար մաքուր են պահվում ուղղակի խոնավ կտորների միջոցով։ Այնուամենայնիվ, հարկ է նշել, որ շատ պողպատե պատուհաններ ոչ թե ամբողջությամբ են մետաղական, այլ ունեն փայտանյութային հիմք և արտաքինից պատված են պողպատով։
Իսկ որո՞նք են թերությունները։ Պողպատը բավականին ծանր է, ինչը զգալի է այս տեսակի պատուհանները բացել և փակելու ժամանակ։ Իր ծանրության պատճառով, դրա արժեքն ու տեղադրումը նույնպես ավելի թանկ արժեն, քան շատ այլ տեսակի պատուհաններինը։
Հետևապես՝ ապահովության մեծ կարիք չունենալու դեպքում, այն երևի թե ցանկալի չէ օգտագործել տան համար։
Պլաստիկից Պատուհաններ
Պլաստիկից, պոլիվինիլ քլորիդից, կամ ինչպես առավել հաճախ են կոչում, ՊՎԽ պատուհանները պատրաստված են ճկուն պլաստիկ նյութից։ Այս պատուհանի տեսակը բավականին տարածված է բարձր երկարակեցության և էներգաարդյունավետության պատճառով։
Չնայած այս նյութն իր թեթևությամբ նման է ալյումինին՝ այն առավել դիմացկուն է ժանգի, կոռոզիայի և արտաքին միջավայրից առաջացող այլ վնասների նկատմամբ։ Այն նաև ջերմամեկուսիչ է պոլիվինիլ քլորիդի շնորհիվ, հետևաբար, հարմար է ցուրտ կլիմաներով տարածքների համար։
Տեսականորեն, այս պատուհանները հակված են արևի ճառագայթներից գունաթափվելու։ Սակայն հարկ է նշել, որ պրակտիկայում քիչ են հանդիպում նման բողոքներ։ Նաև թերություն է այն, որ որևէ հատվածի վնասման դեպքում պլաստիկե պատուհանները սովորաբար չի լինում մասամբ նորոգել, և կարիք է լինում դրանք ամբողջությամբ փոխարինելու։
Մետաղապլաստե Պատուհաններ
Եթե նախորդ պատուհանի տեսակի պրոֆիլում ավելացվի լրացուցիչ մետաղի շերտ, այն վերածվում է մետաղապլաստե պատուհանի։ Այս տեսակն առավել ամուր է ու խորհուրդ է տրվում հիմնականում բարձրահարկ շենքերի վերևի հարկերի համար, հատկապես՝ քամոտ եղանակներին։
Մետղապլաստե պատուհաններն առավել ամուր են, քան պարզապես ՊՎԽ պատուհանները։ Նախ՝ դրանց միջին ծառայութան ժամկետը կարող է հասնել 50-60 տարու։ Բացի այդ, մետաղե նյութով ամրացումը պլաստիկե պատուհանը դարձնում է առավել ամուր ու չդեֆորմացվող տարբեր արտաքին գործոններից։
Ամեն դեպքում, նման պատուհանները համարվում են չշնչող։ Դուք սա հատկապես կզգաք տաք եղանակին փակ պատուհանների պայմաններում։ Նաև, մոտ 27°C-ից ավել տաքության դեպքում, այս պատուհանների պլաստիկե հատվածը որոշակի քիմիկան նյութեր է արտազատում, ինչից սպեցիֆիկ հոտ կարող է զգացվել։
Փայտե Պատուհաններ
Ինչպես տան վերանորոգման շատ այլ ասպեկտներում, այնպես էլ պատուհանների պարագայում, փայտն ամենահարգի և բնական գեղեկցություն ունեցող նյութերից է։ Այն առավել թանկ է, քան ալյումինե պատուհանը, սակայն առավել դիմացկուն է և ջերմամեկուսիչ։
Սակայն, հարկ է նշել, որ փայտն առավել հուսալի է և կարող է խնայել տան տաքացման համար ծախսված էլեկտրաէներգիան միայն այն պարագայում, եթե գտնվում է իդեալական վիճակում։ Այն առավել հակված է խոնավությունից կամ ցրտից ճաքելու ու փտելու։ Իսկ նույնիսկ փոքր տարածքի վնասվածքներով փայտե պատուհանն այլևս ջերմամեկուսիչ չէ։
Պատուհանների Տեսակներն Ըստ Արտաքին Տեսքի և Դիզայնի
Չմոռանալով, որ պատուհանները մեծ դեր են խաղում տան էսթետիկայի հարցում, այժմ անդրադառնանք նաև դրանց հիմնական տեսակներին գեղագիտական տեսակետից։
Փեղկավոր Պատուհաններ
Ամենաունիվերսալ ու հաճախ հանդիպող տեսակը փեղկավոր պատուհաններն են, որոնք ունեն մեծ ապակիներ՝ չընդհատվող որևէ տեսակի փայտե կամ այլ կտորներով պատուհանի մեջտեղում։ Այսպիսի մեծ ապակիների շնորհիվ էլ փեղկավոր պատուհանները ամենահարմար տարբերակներից են սենյակում բնական լույս ունենալու համար։
Այս տեսակը կոչվում է փեղկավոր, քանի որ պատուհանի ապակիները մտած են փեղկերի կամ շրջանակների մեջ։ Ամեն առանձին պատուհան ամրացված է կողքից ամրակների միջոցով և բացվում է սովորաբար դեպի դուրս՝ 90° անկյան տակ՝ հեշտացնելով սենյակի օդափոխումը և պատուհանների մաքրումը։
Քանի որ ապակիները բավականին ամուր են ամրացված փեղկերի մեջ և դռների նման կախվում են առաստաղից, այս պատուհանները թույլ չեն տալիս ջրի թափանցում դեպի տուն և համարվում են էներգաարդյունավետ, քանի որ տան ջեռուցման ժամանակ կանխում են դրսի սառը ջերմաստիճանի թափանցումը դեպի տուն։
Դեպի Վեր Բացվող Պատուհաններ
Ծածկի կամ հովանու նման բացվող այս պատուհանները բացվում են դեպի դուրս և վերև ներքևի հատվածից։ Որոշակի առումով, այս պատուհանները անձրևանոցի դեր են կատարում տարածքի համար։ Դեպի վեր բացվելով՝ դրանք պաշտպանում են սենյակը անձրևի ժամանակ այնպես, որ կարելի է շնչել թարմ օդ՝ միաժամանակ խուսափելով տան ներսը թրջելուց։
Այս պատուհանները բացվում են կա՛մ ձեռքով՝ կեռանման փականի օգնությամբ, կա՛մ հատուկ մեխանիզմով, որը բացելու համար բավական է սեղմել համապատասխան կոճակը։
Նմանատիպ պատուհանները օգտագործվում են ինչպես առանձին, այնպես էլ պանորամային պատուհանների վերևի մասում, որպես օդափոխության հարմար տարբերակ, երբ չեք ցանկանում բացել ամբողջ պատուհանը։ Դեպի դուրս բացվելու պատճառով, առավել ցանկալի է նման պատուհաններ չտեղադրել առաջին հարկում, քանի որ կարող են խանգարել դրսում զբոսնող մարդկանց կամ տեղափոխվող իրերի։
Միակողմանի Կամ Երկկողմանի Բացվող Պատուհաններ
Արտաքին տեսքից դատելով՝ շատ հեշտ է շփոթել պատուհանների այս երկու տեսակները։ Դրանք ունեն նմանատիպ տեսք՝ սովորաբար երկու հավասար մասից բաղկացած նմանատիպ պատուհանային հատվածներ՝ տեղակայված մեկը մյուսի վրա։
Հիմնական տարբերությունը օգտագործման ձևի մեջ է։ Միակողմանի բացվող պատուհանի դեպքում միայն ներքևի հատվածն է բացվում՝ սահելով դեպի վեր։ Երկկողմանիի դեպքում, կարող եք բացել նաև վերին պատուհանը՝ սահեցնելով այն վերից վար։ Չնայած այն հանգամանքին, որ երկկողմանի բացվող պատուհանն առավել օպտիմալ է և հարմար, այն նպատակահարմար չէ օգտագործել վատ եղանակային պայմաններին, քանի որ վերին փակ շերտը արդյունավետ կերպով պաշտպանում է փոշուց և տեղումներից։
Այս պատուհանները սովորաբար վինիլային կամ ալյումինե նյութերի հետ են համատեղվում, հաղորդում են շենքերին դասական տեսք։ Երկկողմանի բացվող պատուհաններն առավել հեշտ է մաքրել, քան միակողմանին։
Ֆիքսված՝ Չբացվող Պանորամիկ Պատուհաններ
Ընդարձակ տարածքի զգացողությունն ու մաքուր՝ անխոչընդոտ տեսարանը շատ մարդկանց իդեալական տան պատկերացումներից են։ Այդպիսի դեպքերում օգտագործվում են պանորամիկ պատուհաններ՝ որոնք, միայն մեկ (կամ մի քանի խոշոր) ապակիներից բաղկացած պատուհաններ են, չունեն փեղկեր կամ այլ շեղող դետալներ ապակու մեջտեղում։ Այլ կերպ ասած՝ այյս պատուհանները ստեղծում են առհասարակ պատուհան չլինելու էֆֆեկտ։
Այսպես, այստեղ գլխավոր առավելությունը արտաքին տեսքն է։ Նմանատիպ պատուհանները շատ նորաոճ են, և հատկապես գեղեցիկ տեսարան ունենալու դեպքում, ապահովում են իսկական վայելք տանտիրոջ աչքերի համար։
Սակայն, նմանատիպ պատուհանները հազիվ թե կարելի է անվանել պրակտիկ։ Նախ՝ նրանք չեն բացվում, ինչը նշանակում է պատուհանների ամենակարևոր գործառույթը՝ օդափոխանակությունը, չի իրականացվում։ Բացի այդ, այս պատուհանները մեծ ռիսկ ունեն ցուրտ եղանակին՝ դրսի սառն օդը տաքացվող տուն բերելու և տաք եղանակին՝ դրսի ամբողջ կիզիչ արևից ներսում տոթ դարձնելու։
Ելուստաձև Կամ Կամարաձև Պատուհաններ
Ընդհանուր շինությունից դեպի դուրս եկող պատուհանները հետաքրքիր ճարտարապետական լուծում են՝ ստեղծելով 3D էֆֆեկտ։ Բացի տեսքից, այս պատուհանները բավականին շատ բնական լույսի աղբյուր են տան համար, քանի որ հաճախ դիմացի և կողային պատուհանները 90°-ի անկյուն են կազմում՝ թույլ տալով լույսին թափանցել ներս ամեն կողմից։
Այս պատուհանները սովորաբար բաղկացած են երեք հատվածից։ Դիմային՝ ուղիղ հատվածը հաճախ կարող է լինել դեկորատիվ և չբացվող, իսկ կողային պատուհանները բացվում են օդափոխության նպատակով։
Կան այսպիսի պատուհանների նաև կամարաձև կամ կիսաշրջանաձև տեսակներ, երբ դիմային ու կողային պատուհանները չեն հատվում որևէ անկյան տակ, այլ սահուն կամար են կազմում։ Քանի որ ելուստաձև պատուհանները յուրահատուկ ոճ ունեն, դրանց կարելի է հանդիպել տարբեր ժամանակաշրջանների ճարտարապետական լուծումներում։
Սահող Պատուհաններ
Կարելի է ասել, սահող պատուհանները ֆիքսված պանորամիկ պատուհանների առավել հարմարավետ տարբերակն են։ Ճիշտ է, նրանք ունենում են պատուհանային հատվածներն իրարց բաժանող փեղկեր, սակայն այստեղ ևս հիմնական մասը զբաղեցնում է լայն ապակին՝ բացելով հրաշալի տեսարան։
Այս պատուհանները սահում են դեպի կողք։ Բացի կողպեքից, սահող պատուհանները գրեթե այլ մեխանիկական կոմպոնենտներ չունեն։ Սա հեշտացնում է նրանց կառուցումը, և, սովորաբար, առավել քիչ արժեք է ներառում, քան պատուհանների այլ տեսակներ, որոնք մի քանի տեղից ամրանում են և բացվում։
Նման պատուհանները արդյունավետ են հաճախակի և շատ օդափոխությունների համար։ Հիմնականում օգտագործվում են պատշգամբներում, մեծ հյուրասենյակներում, և այլն։ Բացասական կողմերից կարող է լինել դրանք մաքրելու դժվարությունը, քանի որ հատակից առաստաղ ապակիները առավել հաճախ են կեղտոտվում, քան փոքր ապակիներով պատուհանները։
Դեկորատիվ Ապակյա Պատուհաներ
Ինչպես կարող եք հասկանալ նկարից, այս պատուհանները չեն կատարում դասական պատուհանների դեր։ Դրանք սովորաբար չեն բացվում, ֆիքսված են ու կառուցվում են անթափանց գունավոր ապակիներով։ Այսինքն՝ այս պատուհանները նպատակահարմար չեն ո՛չ լուսավորության, ո՛չ գեղեցիկ տեսարանի, ո՛չ էլ օդափոխության համար։
Փոխարենը, դրանք հրաշալի դեկորատիվ էֆֆեկտ ունեն։ Հաճախ օգտագործվում են տան այն հատվածներում, որտեղ կարիք կա անթափանց, առանձին միջավայր ապահովելու, սակայն դիզայնի առումով նպատակահարմար չէ օգտագործել պատ կամ վարագույր։ Օրինակ՝ դեկորատիվ ապակյա պատուհանները լինում են դրսի դռան կողային հատվածներում, լոգարանի դռան մոտ, և այլն։
Գունավոր ապակիները կարող են լինել ինչպես միատոն ու առանց նախշերի, այնպես էլ տարբեր նախշերով ու անհարթ մակերեսով։ Այնուամենայնիվ, կարող եք հանգիստ լինել, որ դրանք դրսից քիչ են թափանցում կամ առհասարակ չեն թափանցում՝ կախված ընտրված ապակու տեսակից։
Եզրակացություն
Պատուհան ընտրելիս հաճախ կարող է բարդ լինել համատեղել ճիշտ օդափոխությունը, ցանկալի տեսարանը, բնական լուսավորությունն ու էներգախնայողությունը պատուհանի մի տեսակի մեջ։
Այդ պատճառով, նախքան պատուհանի տեսակը որոշելը, եթե հնարավոր է, բնակարանի դեռ նախագծման փուլում, հստակ որոշեք, թե տվյալ տարածքում ինչն է Ձեզ համար առավել առաջնահերթ և ըստ դրա կատարեք ընտրությունը։
Մի մոռացեք, որ պատուհանները չափազանց կարևոր դեր են կատարում տան և ցանկացած փակ տարածքի համար։ Այս բլոգում նշված և շուկայում առկա այլ պատուհանների տեսակները թույլ են տալիս գտնել հարմար տարբերակ ցանկացած տան համար։
