Լամինատը բավականին ունիվերսալ նյութ է։ Թեև այն առավել տարածված է համարել հատակի ծածկույթ, լամինատը նաև լայնորեն օգտագործվում է կահույքագործության մեջ՝ ՄԴՖ և փայտե կահույքի արտաքին շերտի հարդարման համար։
Դեկորատիվ նրբատախտակների մեջ լամինատն ամենահարուստն է իր դիզայնների ու ոճերի բազմազանությամբ։ Փայլուն, անփայլ կամ տարբեր տեքստուրաներով այս նյութը թույլ է տալիս ցանկացած ինտերիերի մտահաղացում իրականություն դարձնել։
Շուկայում կարող եք գտնել ամենատարբեր գների լամինատներ, որոնք հիմնականում տարբերվում են հաստությամբ ու ամրությամբ՝ ըստ օգտագործման նպատակի։
Այս բլոգում կգտնեք լամինատի՝ այս պահին ամենատարածված 12 տեսակները և դրանց հիմնական կիրառությունները։ Եթե տան կամ այլ շինության վերանորոգման փուլում եք, այս նյութի տեսակներն ու դրանց տարբերություններն իմանալը Ձեզ շատ կօգնի։
Լամինատն ու Ջրակայունությունը
Առհասարակ, լամինատն ու 100%-ոց ջրադիմացկունությունը ոչ հաճախ հանդիպող երևույթներ են։ Սովորաբար, լամինատը ջրից կամ խոնավությունից դեֆորմացվում է, սալիկները կարող են դուրս գալ տեղերից, ինչպես նաև մեծ է բորբոսի առաջացման հավանականությունը։
Սակայն լամինատի որոշ տեսակներ ավելի երկար կարող են փոփոխության չենթարկվել ջրից, քան մյուսները։ Օրինակ՝ որոշ լամինատներ կարող են փչանալ ջրի տակ գտնվելուց 2-3 ժամվա ընթացքում, մինչ մյուսները կարող են դիմանալ մինչև 24 ժամ կամ ավել։
Եթե լամինատ արտադող ընկերությունը ներկայացնում է իր արտադրանքը որպես ջրակայուն, պետք է ուշադրություն դարձնել expansion rate-ին, կամ, թե ինչքան արագ լամինատը կարող է փոփոխել իր չափսերն ու ընդարձակվել՝ կախված արտաքին գործոններից։ Քանի որ այս նյութի հիմքում ընկած է փայտե մանրաթելերից պատրաստված նյութ՝ եթե ջուրը թափանցի լամինատի արտաքին շերտերով և հասնի այդ ջուր կլանող սկզբնական հատվածին, որոշակի փոփոխություններ նյութի հետ տեղի կունենան։ Այդ է պատճառը, որ լամինատը համարվում է լողացող հատակ, և սովորաբար մինչև 10 մմ. ազատ տարածք է թողնվում ջերմաստիճանից կամ այլ արտաքին գործոններից նյութի չափսերի փոփոխության համար։
Վերադառնալով ջրակայունության թեմային, ամենայն հավանականությամբ Դուք կարող եք գտնել ոչ թե անմբողջությամբ ջրակայուն, այլ ջրի նկատմամբ երկար ժամեր դիմացկուն մնացող լամինատ։ Հիմնականում, նման լամինատները դիմանում են 24-48 ժամ ջրի տակ գտնվելուն՝ առանց խոնավություն կլանելու։ Որոշ դեպքերում, միգուցե կարողանաք գտնել մինչև 168 ժամ ջրադիմացկունությամբ լամինատներ։
Լամինատի Տեսակներն Ըստ Օգտագործման Նպատակի
Առհասարակ, լամինատները հիմնականում հասանելի են 0.6-35 մմ. հաստությամբ։ Դեկորատիվ (հիմնականում` կահույքի համար) լամինատները առավել բարակ են ու քիչ դիմացկուն, համեմատած կոմերցիոն տարածքների հատակի ծածկույթի համար նախատեսված լամինատների։
Հատակի Լամինատ
Լամինատի առավել տարածված կիրառությունը հատակի երեսպատումն է։ Այն սինթետիկ նյութ է, բաղկացած մի քանի շերտերից, որոնք իրար են ձուլվում լամինացման պրոցեսի ընթացքում։ Լամինատն առավել նախընտրելի հատակի ծածկույթ է գնի, հեշտ տեղադրման, քիչ ընթացիկ խնամք պահանջելու և արտաքին տեսքի բազմազանության համար։ Լավ որակի լամինատները հաճախ արտաքինից չեն տարբերվում փայտից, քարից կամ այն նյութից, որի իմիտիացիայով ստեղծված են։
Դեկորատիվ Լամինատ
Հիմնականում նախատեսված փայտե կահույքի արտաքին շերտի համար՝ այս տեսակի լամինատը սովորաբար ոչ այդքան հաստ, տարբեր դիզայններով (փայտային և ոչ փայտային) նյութ է։ Այն ունի որոշակի դիմացկունություն խազերի և մաշվածության նկատմամբ, բայց հիմնականում օգտագործվում է բնակարանային կահույքի համար ու պահանջում է առավել զգույշ օգտագործում երկար ծառայելու համար։
Արդյունաբերական Տարածքների Համար Լամինատ
Պահեստների, կոմերցիոն տարածքների և առավել մարդաշատ վայրերի համար հիմնականում օգտագործվում է հատուկ նախատեսված լամինատ։ Սովորաբար այն հրակայուն է, զգալիորեն ավելի ամուր քան դեկորատիվ լամինատը, և դիմացկուն է հաճախակի օգտագործման պայմաններում։ Այս տեսակի լամինատը բավականին պաշտպանված է մաշվելուց։
Լամինատե Տեսակներն Ըստ Օգտագործման Եղանակի
Ձեր ընտրած թիթեղից կախված՝ մասնագետը տարբեր ձևով է աշխատում լամինատի հետ։ Տների ինտերիերներում օգտագործվող լամինատի հատակները հիմնականում սոսնձվում են՝ երկարաժամկետում ծառայելու համար։
Սովորական Լամինատե Թիթեղ
Նմանատիպ լամինատե թերթերը ունեն 0,8 մմ.-ից մինչև 1,5 մմ. հաստություն: Մեծ մասը սոսձնվում են հատակին հատուկ նախատեսված շինարարական սոսինձներով՝ ապահովելով հատակի դիմացկունությունը։ Սոսնձելով լամինատը անմիջապես հատակին՝ մանրատախտակի հատիկները առավել քիչ է հավանական որ կփչանան կամ տեղից դուրս կգան խոնավության դեպքում։
Կոմպակտ Լամինատե Թիթեղ
Այս՝ ավելի հաստ լամինատե թիթեղները սովորաբար լինում են 3 մմ.-ից 30 մմ.: Նման նյութը չի սոսնձվում փայտին կամ որևէ այլ նյութի, այլ պարզապես ամրացվում է նախատեսված մակերեսի վրա: Այն ջրակայուն է, ինչի արդյունքում շատ է օգտագործվում որպես խոհանոցի աշխատասեղանի մակերես։
Կոմպակտ լամինատը պատրաստված է վերամշակված թղթի մանրաթելերի շերտերից՝ խառնված հատուկ խեժի հետ: Պատրաստման ընթացքում այն սեղմվում է բարձր ճնշման տակ՝ դառնալով դիմացկուն ու ամուր։
Լամինատի Տեսակներն Ըստ Մակերեսի Տեսակի
Վերանորոգման ընթացքում առավել հաճախ բախվելու եք հենց այս ընտրությանը. ի՞նչպիսի մակերես ընտրել, որ արտաքին տեսքը աչք շոյի, միաժամանակ հեշտ լինի մաքրելն ու հետագա խնամքը։
Անփայլ Մակերեսով Լամինատ
Այս լամինատները չեն փայլուն նույնիսկ վառ լույսի տակ և սովորաբար առավել զուսպ ու նորաոճ տեսք են տալիս տան կահույքին։ Բացի արտաքին տեսքից մյուս առավելությունն այն է, որ դրանք ավելի քիչ նկատելի են դարձնում մատնահետքերը և քերծվածքները, քան փայլուն լամինատը:
Անփայլ լամինատներ հաճախ են օգտագործվում հատակների, խոհանոցի պահարանների և գրասենյակային կահույքի համար:
Փայլուն Մակերեսով Լամինատ
Այս տեսակի լամինատները մակերեսին տալիս են շողշողուն փայլ ու հայելային էֆեկտ: Այն առավել գրավիչ ու վառ է դարձնում ինտերիերը, սակայն կարող է հոգնեցնող լինել երկարաժամկետում տան պայմանների համար: Ընդհանուր առմամբ, այս լամինատները հիմնականում օգտագործվում են ռեստորաններում, սպա սրահներում, հյուրանոցներում, ինչպես նաև միջոցառումների անցկացման վայրերում:
Եթե այնուամենայնիվ ընտրեք նման լամինատ տան համար, առավել բաց գույների կահույքի լամինատն ավելի հեշտ է մաքրվում համեմատած մուգ գույների։
Փայտի Իմիտացիայով Լամինատ
Քանի որ փայտե մանրահատակները (պարկետ) համարվում են ամենաբնական ու հուսալի հատակի ծածկույթի տեսակ, սակայն գտնվում են գնային բարձր սեգմենտում, փայտի իմիտիացիայով լամինատները որոշակի «փոխարինող» դեր են ստանձնում։ Փայտային մակերեսով լամինատը ինտերիերին հաղորդում է բնական ու փայտային տաք միջավայր և արտաքինից շատ քիչ է տարբերվում իրական փայտից։
Այն նաև բավականին հեշտ է մաքրել ու փայլեցնել և հավասարապես գեղեցիկ է տան կամ կոմերցիոն տարածքների ինտերիերի համար։
Տեքստուրային Լամինատ
Այս մակերեսով լամինատը հարմար է տարբեր կոլորիտով ինտերիեր դիզայնների համար, քանի որ այն ստեղծում է բնական տեքստուրաների էֆեկտ։ Օրինակ, որոշ տեքստուրային լամինատները արտաքինից նման են կաշվի, քարի, մետաղի, և այլն, սակայն իրականում դրանք դեկորներ են տպագրված թղթային մակերեսի վրա։
Տեքստուրային լամինատների ամենամեծ առավելությունն է դիզայնի ու գույների մեծ ընտրությունը։ Սակայն որոշ տեքստուրաներ կարող են ավելի շատ ընգծել խազվածքներն ու մաշվածություննն ու առավել բարդ լինել մաքրելու առումով։
Միագույն Լամինատ
Մինիմալիստական դիզայնի սիրահարների համար միատոն երանգով լամինատները լավագույն ընտրությունն են։ Դրանք կարող են լինել փայլով կամ առանց և չունեն որևէ տեքստուրա կամ նախշ իրենց վրա։ Այս լամինատե սալիկներն ամբողջությամբ միագույն են՝ ստեղծելով աչքի համար առավել հանգիստ միջավայր։ Նեյտրալ գույների ընտրության դեպքում այս մակերեսով լամինատն ամենաունիվերսալ ու հեշտ համադրվողն է ինտերիեր այլ դետալների հետ։
Լամինատի Տեսակներն Ըստ Որակային Հատկանիշների և Դիմացկունության
Թեև առօրյա վերանորոգման պրոյեկտներում շատերը քիչ են ուշադրություն դարձնում հատուկ դիմացկունություն ունեցող լամինատներին, սակայն այս նյութի հատուկ տեսակներ շատ դիմացկուն են։ Կախված օգտագործման վայրից ու նպատակից, երբեմն անհրաժեշտ է լինում ընտրել հատուկ տեսակի լամինատի թիթեղ։
Հրակայուն Լամինատ
Լամինատի որոշ տեսակներ պատրաստված են հատուկ հրակայուն խեժից, որն իր կառուցվածքի արդյունքում ընդունակ է կլանել բարձր աստիճանի տաքություն՝ միաժամանակ չբոցավառվելով և չփոխելով իր արտաքին տեսքը։ Հրակայունությունը բնորոշ չէ բոլոր լամինատի տեսակներին, այնպես որ եթե տեղանքի բնույթից կախված հրդեհների ռիսկը մեծ է, պետք է հատուկ ուշադրություն դարձնել ճիշտ լամինատի ընտրությանը։
Արտաքին տեսքի առումով այս լամինատները նման են այլ լամինատների։ Հասանելի են տարբեր գույներով ու դիզայններով և հիմնականում օգտագործվում են մեծ տարածքներում՝ օդանավակայաններ, հյուրանոցներ, և այլն։
Հակաբակտերիալ Լամինատ
Պատրաստված հատուկ մելամինի խեժով՝ հակաբակտերալ լամինատի արտաքին շերտը պատված է մակերեսով, որը արգելակում է բակտերաների և հարուցիչների բազմացումը։ Այսպիսի լամինատը հաճախ օգտագործվում է այնպիսի վայրերում, որտեղ սանիտարահիգիենիկ նորմերի պահպանումը խիստ անհրաժեշտություն է, օրինակ՝ հիվանդանոցներում։
Արտաքին Միջավայրում Օգտագործվող Լամինատ
Շինությունների ներսում օգտագործվող լամինատը քիչ է բախվում արտաքին գործոնների, ինչպիսիք են, օրինակ, ուլտրամանուշակագույն ճառագայթները։ Սակայն եթե ցանկանում եք օգտագործել լամինատը շինություններից դուրս վայրերում, օրինակ՝ արտաքին գովազդի վահանակներ, դրսի դռներ կամ պատուհաններ պատրաստելիս, հատուկ տեսակի լամինատը թույլ է տալիս դա անել։
Այս տեսակի թիթեղները ունեն հատուկ արևի ճառագայթներից պաշտպանող հեղուկ թաղանթ, ինչը թույլ չի տալիս մաշվածություն կամ դեֆորմացում երկար ժամանակ դրսում գտնվելիս։
Եզրակացություն
Լամինատը վստահ կարելի է օգտագործել հատակի, կահույքի, պատերի կամ այլ դեկորատիվ էլեմենտների համար իր ճկունության ու բազմապիսի դիզայնի շնորհիվ։ Սակայն կարևոր է հիշել, որ այս նյութն ունի շատ տեսակներ, ուստի, նախքան շինարարական աշխատանքների սկսումը, կարևոր է ճիշտ ընտրել համապատասխան լամինատի տեսակը։
Դեկորատիվ նյութերի մեջ այն բավականին հասանելի է գնային տեսակետից, միաժամանակ առաջարկում է տարբեր ոճային լուծումներ։ Այս պատճառով էլ լամինատը ներկայումս ամենապահանջված շինարարական նյութերից է, հիմնականում՝ հատակի ծածկույթի համար։
