Պատերի ձևավորումը վերանորոգման կարևորագույն մասերից է։ Դա պայմանավորված է նրանով, որ պատերը զբաղեցնում են տան տարածքի մեծ մասը, և ակամայից ամենաշատը նայում ես դրանց։ Ուստի հատուկ ուշադրություն պետք է դարձնել պատի դեկորների ընտրությանը՝ տանը ցանկալի միջավայր ապահովելու համար:
Պաստառների կիրառությունը պատերի հարդարման գործում հատկապես խորհուրդ է տրվում նորակառույց շինություններում, քանի որ սկզբնական շրջանում նմանատիպ շինությունները ունենում են բնական նստվածք, որի հետևանքով պատերին առաջանում են ճաքեր, իսկ պաստառները հնարավորություն են տալիս քողարկելու այն:
Պաստառների Հիմնական Առավելությունները
- Ընտրության Լայն Տեսականի. Այժմ կա պաստառների շատ մեծ ընտրության տեսականի՝ ամենամինիմալիստական և միատոն տարբերակներից մինչև բարդ դիզայնային լուծումներ։ Տարբերակների մեծ մասի նմուշները կարող եք անձամբ տեսնել և շոշափել խանութներում, ինչը նույնպես հեշտացնում է ընտրությունը։
- Տեղադրման Հեշտությունը. Երբեմն տան տերերը, որոնք չեն հանդիսանում մասնագետներ, կարողանում են ինքնուրույն կախել պաստառները առանց հատուկ հմտությունների: Շատ արտադրողներ պաստառի փակցման հրահանգները ներառում են փաթեթավորման մեջ, ինչը որոշներին օգնում է ինքնուրույն ամրացնել դրանք:
- Մատչելի Տարբերակների Առկայություն. Կախված արտադրող երկրից, որակից, նյութից և դիզայնից՝ պաստառների գները կտրուկ տատանվում են շուկայում։ Գործնականում հնարավոր է գտնել մատչելի տարբերակներ։ Սակայն, հարկ է նշել, որ որակով առավել ցածր պաստառները կարող են առավել շուտ շարքից դուրս գալ։
- Ցանկացած Ինտերիերին Համապատասխան Լուծումների Առկայություն. Պաստառներն ունեն երանգների և նախշերի ցանկացած համակցությունների ամենամեծ քանակությունը, որը ոչ բոլոր պատի դեկորների տեսակներին է հատուկ: Հատկապես վստահելի եվրոպական և այլ արտադրողների պաստառների կատալոգներում ներառված են պրոֆեսիոնալ դիզայներների կողմից մշակված համադրություններ, որն օգնում է հեշտ կողմնորոշվել։
Պաստառների Օգտագործման Բազային Կանոններ
Բացի արտաքին տեսքից, ինչը գնորդների համար, անկասկած, կարևոր է, պետք է հատուկ ուշադրություն դարձնել պաստառի որակին։
Շատ կարևոր է նաև մասնագետի ճիշտ աշխատանքն ու պաստառները ճիշտ փակցնելը։ Պատշաճ կերպով օգտագործելով պաստառի հատկությունները՝ կարող եք հասնել գերազանց արդյունքի՝ որակի և արտաքին տեսքի առումով։
Մեդալի հակառակ կողմն էլ այն է, որ սխալ ընտրված երանգի կամ որակի կամ վատ փակցված պաստառը կարող է զգալիորեն ազդել տան տեսքի և ընդհանուր միջավայրի վրա։
Պաստառների սոսնձման համար հարկավոր են հարթ պատեր։ Սա չի ենթադրում կատարյալ հարթություն, որը շինարարական աշխատանքներում առհասարակ հեշտ չէ ստանալ։ Սակայն կարևոր է անմիջապես պաստառի տակ գտնվող պատի մակերեսի համար ապահովել բավարար հարթություն՝ որպեսզի այն նույնպես փակցվելուց հետո հարթ և սահուն երևա։
Հուսադրող է այն հանգամանքը, որ պաստառների որոշ տեսակներ հաջողությամբ կարող են թաքցնել պատերի որոշ անհարթություններ:
Համեմատության համար պետք է նշել, որ պատերը ներկելու համար անհրաժեշտ է դրանք առավել մանրակրկիտ նախապատրաստել ու հարթեցնել, ինչը ծախսատար է և շատ ժամանակ է պահանջում:
Սոսնձի ընտրությունը կախված է պաստառի տեսակից։ Հիմնականում պաստառի պիտակի վրա նշվում է, թե որ սոսինձն է համապատասխանում այդ տեսակին: Ծանր պաստառների համար գոյություն ունեն հատուկ սոսինձներ։
Պաստառներն Ըստ Հիմնական Որակական Հատկությունների
Պաստառի ընտրության ժամանակ կարևոր նախապայմաններից է պաստառի խոնավադիմացկունությունը, կամ, այլ կերպ ասած, կարելի՞ է այն լվանալ, թե ոչ։ Ըստ այս հատկության տարբերակվում են պաստառների երեք հիմնական տեսակներ։
Սովորական Պաստառներ
Այս տեսակի պաստառները նախատեսված են նվազագույն խոնավությամբ սենյակներում օգտագործելու համար: Դրանք կարելի է չոր մաքրել՝ փափուկ խոզանակով կամ փոշեկուլով։ Ամենակեղտոտված տեղերում կարելի է թեթևակի սրբել խոնավ (բայց ոչ թաց) սպունգով: Այս խումբը հիմնականում ներառում է թղթե պաստառներ, ինչպես նաև ակրիլային պաստառների որոշ տեսակներ (որոնք ավելի էժան են):
Խոնավադիմացկուն Պաստառներ
Այս տեսակի պաստառները նախատեսված են չափավոր խոնավությամբ սենյակներում օգտագործելու համար: Սրանց մաքրումը հնարավոր է լաթով և սպունգով, բայց առանց ավելորդ ջանքերի։ Թույլատրվում է լվանալ թույլ քիմիական բաղադրությամբ հեղուկ մաքրող նյութերով։ Նման մաքրումը թույլատրելի է սահմանափակ հաճախությամբ։
Լվացվող Պաստառներ
Այս տեսակի պաստառները նախատեսված են տարբեր աստիճանի խոնավություն ունեցող սենյակներում օգտագործելու համար: Սրանք կարելի է մաքրել խոնավ խոզանակների միջոցով: Հատկապես աղտոտված տարածքներում թույլատրվում է մաքրել ջրով և ոչ ագրեսիվ հեղուկ լվացող միջոցներով:
Պաստառների Առավել Լայն Դասակարգում
Առանձնացվում են հարթ մակերեսով պաստառներ, ռելիեֆ մակերեսով պաստառներ, նուրբ նախշերով պաստառներ և խորը նախշերով բազմաշերտ պաստառներ։
Ըստ հաստության պաստառները լինում են ցածր խտությամբ և խիտ պաստառներ, որոնք չափազանց դժվարությամբ են սոսնձվում անհարթ մակերեսի վրա։ Այս տեսակը սակայն օգնում է պահպահնել սենյակի ճիշտ միկրոկլիման։
Ըստ դիզայնի պաստառները լինում են հարթ մակերեսով միագույն և նախշերով պաստառներ։
Ժամանակակից պաստառների բազմազանության մեջ կարելի է առանձնացնել մի քանի հիմնական տեսակներ։
Թղթե Պաստառներ
Նման պաստառները պատրաստվում են տարբեր տեսակի թղթից և հեշտությամբ ներծծում են ջուրը։ Թղթե պաստառները հարմար չեն բարձր խոնավություն ունեցող սենյակների՝ խոհանոցի, լոգարանի կամ զուգարանի համար։
Արևի լույսի ազդեցության տակ ցածր որակի թղթե պաստառները շատ շուտ գունազրկվում են: Ավելի բարձրորակ պաստառներն ունեն ուլտրամանուշակագույն ճառագայթներից պաշտպանող լրացուցիչ շերտ։
Այնուամենայնիվ, եթե Ձեզ անհրաժեշտ է մատչելի և «շնչող» նյութ պատերի ձևավորման համար, ապա թղթե պաստառը կարելի է դիտարկել: Սոսնձման ժամանակ օգտագործվում է ամենապարզ սոսինձը, որը քսում են ինչպես պատին, այնպես էլ կտավին։
Թղթե Պաստառներն Ըստ Մակերեսի
- Միաշերտ, որը նաև կոչվում է սիմպլեքս. Դրանք պետք է ընտրել ոչ միայն արտաքին տեսքով, այլև թղթի որակով։ Սա սովորաբար ամենամատչելի պաստառի տեսակն է: Եվս մեկ նրբություն. թղթե պաստառները տեսանելի են դարձնում պատի բոլոր կամ գրեթե բոլոր անհարթությունները:
- Բազմաշերտ. Երկու շերտից կազմված պաստառները կոչվում են դուպլեքս, իսկ երեքից կազմվածները՝ տրիպլեքս։ Թղթե պաստառների այս տեսակն ավելի հաստ է և կարող է ունենալ դաջված նախշ: Իրենց ավելի մեծ խտության շնորհիվ նրանք ավելի լավ են թաքցնում պատի անհավասարությունները։ Համեմատած միաշերտ պաստառների, այս տեսակն առավել թանկ է, բայց մատչելի տարբերակներ նույնպես կան։
- Լվացման բարձր ունակությամբ (ջրակայուն). Այս պաստառները լիարժեք իմաստով չի կարելի անվանել լվացվող, բայց այն բավական դիմացկուն է, որպեսզի դիմակայի խոնավ (ոչ թաց) կտորով սրբվելուն: Գնային առումով դրանք մոտավորապես նույն կատեգորիայի են, ինչ բազմաշերտ պաստառները, և հաճախ օգտագործվում են խոհանոցում կամ միջանցքում:
Թղթե Պաստառների Առավելությունները
- Էկոլոգիապես մաքուր են
- Շնչող են
- Ունեն երանգների մեծ ընտրություն
- Ունեն մատչելի գին
Թղթե Պաստառների Թերությունները
- Ոչ երկարակյաց են
- Հեշտ պատռվում են
- Սոսինձը քսվում է անմիջապես պաստառի վրա, ինչը այնքան էլ հարմար չէ
- Արևից գունաթափվում են
- Ցածր ձայնամեկուսացում ունեն
- Ցածր խոնավադիմացկունություն ունեն
Վինիլային Պաստառներ
Վինիլային պաստառների հատկությունները թույլ են տալիս օգտագործել դրանք բարձր խոնավությամբ սենյակներում, մասնավորապես խոհանոցում կամ լոգարանում, բայց ոչ ջրի աղբյուրներին շատ մոտ: Դրանք նաև դիմացկուն են քերծվածքների և խազերի նկատմամբ, հետևաբար, շատ են օգտագործվում միջանցքներում կամ այլ հաճախ անցանելի վայրերում։
Այս տեսակն իրենից ներկայացնում է երկշերտ լվացվող պաստառ, որի հիմքը թուղթն է կամ ֆլիզելինը, իսկ վերին շերտը պոլիվինիլքլորիդ է: Երբեմն հումքի մեջ մտնում են հակասնկային դեղեր: Պոլիվինիլքլորիդը դիմացկուն է, չի կեղտոտվում և չի վնասվում։
Վինիլային Պաստառների Առավելությունները
- Շատ դիմացկուն են և երկարակյաց
- Ունեն գույների և դաջվածքների բազմազանություն
Վինիլային Պաստառների Թերությունները
- Ունեն օդի ցածր թափանցելիություն, ինչը որոշակի վտանգ է ներկայացնում բորբոսի ձևավորման համար:
- Արտանետում են վնասակար ֆորմալդեհիդներ, ուստի խորհուրդ չի տրվում դրանք օգտագործել բնակելի տարածքներում կամ օգտագործելիս պետք է ապահովել լավ օդափոխություն։
Ֆլիզելինային Պաստառներ
Ֆլիզելինը ոչ հյուսված մանրաթել է, որը բաղկացած է ցելյուլոզային մանրաթելից (երբեմն օգտագործվում են արհեստական մանրաթելեր): Այս նյութը ունի բարձր գոլորշիների թափանցելիություն, լավ է փոխանցում օդը և խոնավությունը և լինում է տարբեր խտության:
Բարակ, ոչ հյուսված գործվածքը բավականին առաձգական նյութ է, որը կարող է սոսնձվել անհարթ պատերին: Միջին և բարձր խտությամբ ֆլիզելինային պաստառներն ավելի հեշտ են սոսնձվում, բայց դրանք գործնականում չեն ձգվում, ուստի պահանջում են առավել հարթ պատի մակերես։
Ֆլիզելինային պաստառները լինում են հարթ, հյուսվածքային, դաջված կամ ծավալուն: Դրանք դիմացկուն են և շատ լավ թաքցնում են պատերի անհարթությունները։
Ֆլիզելինային Պաստառների Առավելությունները
- Կարելի է կիրառել որպես հիմք ներկի համար
- Շնչող են
- Քողարկում են պատի մակերեսի թերությունները
- Պաստառապատման գործընթացը պարզ է
- Տարիների ընթացքում չեն կորցնում արտաքին տեսքը
- Հրդեհակայուն են
- Կարելի է լվանալ ջրով և մաքրող միջոցներով
- Չեն գունաթափվում արևի ճառագայթներից
Ֆլիզելինային Պաստառների Թերությունները
- Ենթակա են մեխանիկական ազդեցությունների
- Մակերեսի վրա փոշի են կուտակում
- Բարձրորակ ֆլիզելինային պաստառները (խորհուրդ ենք տալիս գնել միայն որակյալ պաստառներ) բավականին թանկ են
Տեքստիլ Պաստառներ
Տեքստիլ պաստառներն ունեն բազմաշերտ կառուցվածք, որի հիմքը թուղթ կամ ֆլիզելին է, իսկ վերին շերտը՝ տեքստիլ։ Որպես վերին շերտ օգտագործվում են բնական և արհեստական գործվածքներ։
Նման պաստառների արժեքը կախված է հիմնականում նրանից, թե ինչ նյութ է օգտագործվել վերին շերտի համար: Այդ շերտի որակից է կախված նաև պաստառի էկոլոգիապես մաքուր լինելը, երկարակեցությանը և արտաքին տեսքը: Այս տեսակի պաստառները վախենում են բարձր խոնավությունից, գունաթափվում են, և կարելի է մաքրել միայն չոր վիճակում՝ երբեմն օգտագործելով խոնավ սպունգ։
Արտադրության տեխնոլոգիայով պայմանավորված՝ տեքստիլ պաստառները բաժանվում են թելերով պատրաստված և ամբողջական կտավից պատրաստված պաստառների։
Բացի նրանից, որ տեքստիլ պաստառներն ունեն շքեղ տեսք, դրանք առանձնանում են բարձր ձայնամեկուսիչ և ջերմամեկուսիչ հատկություններով:
Ըստ վերին շերտի համար օգտագործվող նյութի՝ տեքստիլ պաստառները լինում են սինթետիկ, ջուտի մանրաթելերից, մետաքսե և թավշյա պաստառներ։
Տեքստիլ Պաստառների Առավելությունները
- Ոնեն գեղագիտական տեսք
- Հայտնի են նախշերի, գույների և հյուսվածքների բազմազանությամբ
- Բարձր ձայնամեկուսացում ունեն
- Բարձր ջերմամեկուսացում ունեն
- Չեն գունաթափվում
- Հրակայուն են
Վուշի մանրաթելեր պարունակող տեքստիլ պաստառներն ունեն նաև մանրէազերծ հատկություններ:
Տեքստիլ Պաստառների Թերությունները
- Ունեն բարձր գին
- Շուտ են կեղտոտվում
- Հարմար չեն օգտագործելու համար բարձր խոնավություն ունեցող սենյակներում
- Փոշին արագ են կուտակում մակերեսի վրա
- Կլանում են հոտերը
Ապակեթելային Պաստառներ
Ապակեթելային պաստառները հյուսված են տարբեր հաստություն ունեցող ապակե մանվածքներից և ներծծված են հատուկ նյութով: Ապակե պաստառը պատին սոսնձելուց հետո ներկվում է լատեքսային կամ ջրային հիմքի ներկով:
Այս եզակի տեսակի պաստառը հրակայուն է։ Ավելին՝ հրդեհի ժամանակ այն չի արտանետում մարդու առողջության համար վտանգավոր նյութեր և համարվում է էկոլոգիապես մաքուր ու անվտանգ:
Այս պաստառները չեն վախենում խոնավությունից և կարող են սոսնձվել խոնավ սենյակներում: Դրանք կարելի է ներկել բազմակի անգամ (ամենաբարձր որակը՝ մինչև 20 անգամ): Ապակեթելային պաստառները պատրաստված են 100% բնական հումքից, իսկ դրանց ծառայության ժամկետը 20-30 տարի է։ Պաստառների այլ տեսակները այս պարամետրերով շատ են զիջում ապակեթելային պաստառներին:
Ապակեթելային Պաստառների Առավելությունները
- Հրակայուն են
- Դիմացկուն են և երկարակյաց
- Չեն կլանում փոշի
- Շնչող են
- Քողարկում են պատերի անհարթությունները
- Ունեն գույների բազմազանություն
- Հեշտ է սոսնձել
- Կարող են սոսնձվել ցանկացած մակերեսի
- Կարելի է բազմիցս ներկել
- Չեն առաջացնում ալերգիա
- Ամրացնում են պատերը
- Կարելի է լվանալ ջրով և մաքրող միջոցներով
Ապակեթելային Պաստառների Թերությունները
- Մեծ դժվարությամբ են քերվում պատերից
- Պաստառապատումից առաջ մակերեսը պետք է մշակվի լատեքսային շերտով
- Ճկուն չեն
- Ներկելու դեպքում պահանջվում է մեծ քանակությամբ ներկ
- Պետք է ներկվեն միայն հատուկ ներկով
- Ունեն բարձր գին
Հեղուկ Պաստառներ
Հեղուկ պաստառի կարևոր հատկությունն այն է, որ այն ամենաքիչ պահանջկոտն է պատի հարթ մակերես ունենալու նկատմամբ: Հեղուկ պաստառն ինքնին կարող է հարթեցնել պատը, որի վրա ամրացվում է: Այնուամենայնիվ, գեղեցիկ արտաքին տեսք ստանալու համար պատի զգալի խորշերը պետք է հարթեցնել համապատասխան ծեփամածիկով։
Հեղուկ պաստառներն ունեն հատուկ բաղադրություն, որի կազմում կարող են լինել գործվածք, բամբակյա մանրաթելեր և ցելյուլոզա: Հեղուկ պաստառը ստեղծում է առանց կարերի, անթերի պատ։ Օգտագործելուց առաջ հումքը խառնում են ջրային հիմքի ներկով և քսում պատերին։
Հեղուկ Պաստառների Առավելությունները
- Պաստառի կառուցվածքը թույլ է տալիս մասնակի վերանորոգում կատարել
- Կարելի է օգտագործել նույնիսկ դժվարամատչելի հատվածներում
- Կարելի է օգտագործել նույնիսկ անհարթ մակերեսների վրա
- Էլաստիկ են
- Ունեն ձայնամեկուսիչ և ջերմամեկուսիչ հատկություններ
Հեղուկ Պաստառների Թերությունները
- Չորանում են մոտ երկու օր
- Փչանում են բարձր խոնավության կամ ջրի անմիջական ազդեցության դեպքում
Մետաղական Պաստառներ
Մետաղական պաստառն ունի թղթե հիմք, որի վրա ավելացվում է ներկված ալյումինից կամ օքսիդացված փայլաթիթեղից պատրաստված մետաղական շերտ, որի վրա իրականացվում է դիզայնը, և այն ծածկվում է լաքի շերտով: Փայլաթիթեղը կարող է տպվել կամ դաջվել:
Մետաղական Պաստառների Առավելությունները
- Հարմար են չոր և թաց մաքրման համար
- Չեն գունաթափվում
- Երկարակյաց են
- Ունեն գրավիչ տեսք
- Կարելի է սոսնձել ցանկացած խոնավությամբ սենյակներում
- Արտացոլում են ինֆրակարմիր ճառագայթումը` ապահովելով ջերմամեկուսացում
- Չեն կուտակում ստատիկ էլեկտրականություն
- Ունեն բարձր ձայնամեկուսացում
Մետաղական Պաստառների Թերությունները
- Մակերեսը, որի վրա սոսնձված է նման պաստառը, պետք է լինի կատարյալ հարթ
- Նուրբ են
- Կարող է արտացոլել արևի ճառագայթները
- Խորհուրդ չի տրվում սոսնձել էլեկտրական լարերի մոտ
- Չեն շնչում
- Հեշտությամբ ենթարկվում են մեխանիկական ազդեցության
- Ունեն բարձր գին
Ակրիլային Պաստառներ
Ավելի ստույգ՝ սա ակրիլային ծածկույթով թղթե պաստառ է։ Պոլիմերը քսվում է կետային, առանց թուղթը ամբողջությամբ ծածկելու, ուստի այն լինում է ոչ հարթ, ռելիեֆային մակերեսով, ինչը գործնականում չի ազդում գույների տեսականու վրա, բայց ազդում է պաստառի քաշի վրա:
Ակրիլային պաստառներն այնքան էլ ծանր չեն, որքան վինիլային պաստառները, այդ իսկ պատճառով օգտագործվող սոսինձը համեմատաբար քիչ է: Պոլիմերի կետային կիրառման շնորհիվ այս տեսակի հարդարումը կարելի է դասակարգել շնչող պաստառների շարքին և օգտագործել բնակելի տարածքներում:
Թուղթը մասնակիորեն ակրիլով պատելը մի փոքր բարձրացնում է դրա դիմադրողականությունը թաց լվացման նկատմամբ։ Այս պաստառները դասակարգվում են որպես ջրակայուն, գունաթափման նկատմամբ դիմադրողականությունը միջին է, ինչպես նաև միջին է դրանց գների կատեգորիան:
Այս պաստառները սոսնձվում են նույն սկզբունքով, ինչ թղթի պաստառները. սոսինձը քսվում է ինչպես պաստառի, այնպես էլ պատի վրա, սոսնձման դժվարությունը միջին է:
Խնդիրներ կարող են առաջանալ, եթե ակրիլային ծածկույթը չափազանց փափուկ է։ Օրինակ, եթե մի փոքր ուժեղ սեղմել նման պաստառի մակերեսին, այն կպոկվի: Շահագործման ընթացքում, նույնպես, ծածկույթը կարող է պոկվել՝ պատահաբար ինչ-որ կոշտ բանով, նույնիսկ եղունգով, նրան դիպչիս: Սա չի վերաբերում բոլոր տեսակի ակրիլային պաստառներին, սակայն որոշ տեսակներին այս բարձր զգայականությունը հատուկ է։
Ֆոտոպաստառներներ
Ֆոտապաստառները լինում են փայլուն և անփայլ, նկարը կարող է տպված լինել ամբողջ պատի կամ դրա ինչ-որ մի հատվածի համար։
Ֆոտոպաստառները պատված են հատուկ պաշտպանիչ շերտով, երկարակյաց են և չեն գունաթափվում, սակայն հարմար չեն բարձր խոնավությամբ տարածքների համար։
Այս տեսակի պաստառները լինում եմ մեծ կտորներով, այդ պատճառով խորհուրդ է տրվում պաստառապատման աշխատանքները վստահել մասնագետի։
