Տարածված կարծիք կա, որ կերամիկական (մետլախ) և կերամոգրանիտե սալիկները երեսպատման նույն նյութի տարբեր անվանումներ են: Թեև կերամոգրանիտե սալիկները արտաքին տեսքով նման են կերամիկական սալիկներին, այս երկու նյութերի մեջ տարբերությունները զգալի են, որոնցից հիմնականը դրանց արտադրական տեխնոլոգիան է:
Կերամոգրանիտե Սալիկի Պատրաստման Գործընթացը
Կերամոգրանիտը արտաքին հարդարման համար նախատեսված, շատ դիմացկուն և ամուր նյութ է՝ բնական քարի նմանակող:
Անվանը հակառակ իր բաղադրության մեջ չի պարունակում գրանիտ, սակայն նման է նրան իր ֆիզիկական հատկություններով: Այն արտադրվում է կիսաչոր պրես-փոշուց 400-500 կգ/սմ 2 ճնշման ենթարկելու միջոցով, որին հաջորդում է թրծումը 1200-1300 0 C ջերմաստիճանում: Այս ջերմությունը նյութին տալիս է գրանիտի կարծրություն:
Պրես-փոշին իր հերթին ստանում են շիլայանման փափուկ ճենապակյա զանգվածը կվարցե ավազի, ջրի և ներկված կավի հետ խառնելով, որն օգտագործվում էր հին ժամանակներում խեցեղենի վրա նկարելու համար: Արտադրանքին գույն տալու համար օգտագործվում են զանազան հանքային պիգմենտներ և արդյունքում պատրաստի արտադրանքը ունենում է միատեսակ գույն:
Երբեմն դեկորացիայի համար օգտագործվում է ջնարակ, փայլեցում, ստեղծում են մակերեսի ռելիեֆային հյուսվածք։ Կերամոգրանիտն օգտագործվում է ինչպես փակ, այնպես էլ բաց տարածքների սալիկապատման համար:
Կերամոգրանիտի Առավելությունները
Կերամոգրանիտե սալիկը բացառիկ արտադրանք է, որում ամփոփված են բնության չորս տարրերի` հողի, ջրի, կրակի և օդի ողջ ուժն ու էներգիան: Դարեր շարունակ մարդն օգտագործում է այն շինարարության մեջ և կատարելագործում սալիկի արտադրությունը` հաղորդելով նրան ավելի բարձր որակ և դարձնելով այն գեղագիտորեն ավելի գրավիչ:
Կերամոգրանիտե սալիկներն աչքի են ընկնում մի շարք առավելություններով։
Չափազանց ամուր են և ունեն բարձր դիմադրողականություն
Դիմացկուն են խորը քայքայման հանդեպ՝ կեղտոտվելու կամ քիմիական նյութերի կիրառման դեպքում
Ցրտադիմացկուն են
Ջրակլանելիության նվազագույն տոկոսը գեղագիտական հիանալի որակների և էկոլոգիապես մաքուր լինելու հետ մեկտեղ տարբերակում են կերամոգրանիտե սալիկները շինարարական նյութերի ոլորտում առկա մյուս տարբերակներից
Արտադրվում են էկոլոգիապես մաքուր նյութերից
Կերամոգրանիտը պահանջում է նվազագույն խնամք՝ մակերեսի մաքրումը, լուրջ կեղտոտման բացակայությամ դեպքում, իրականացվում է սովորական խոնավ շորով
Չի խամրում արևի տակ, ցրտադիմացկուն է և հարմար է օգտագործել դրսում և տանը
Քիմիական մաքրող և այլ նյութերը չեն խախտում ծածկույթի ամբողջականությունը
Արտաքին տեսքի ու գույների լայն ընտրանին թույլ կտան իրականացնել դիզայնի ցանկացած գաղափար
Ունեն կարծրության և ամրության բարձր մակարդակ (կարող եք չվախենալ ծանր առարկաներ դրանց վրա գցելուց)
Կերամոգրանիտի Թերությունները
Գինը սովորաբար բարձր է: Դա բացատրվում է երկար ու դժվարին արտադրությամբ։
Որոշ կերամոգրանիտների վրա խոնավության դեպքում հեշտ է սայթաքել։
Վերամշակման և երեսպատման տեսանկյունից դժվար իրագործելի են: Ձեզ անհրաժեշտ կլինի պրոֆեսիոնալ վարպետների թիմ։
Նյութը ցածր ձայնամեկուսացում ունի։
Այն միշտ մնում է սառը
Կերամոգրանիտի Կատեգորիաները
Կերամոգրանիտը լինում է 5 կատեգորիայի կամ դասի:
5-րդ դասի կերամոգրանիտն ամենաամուրն է: Այն իդեալական է ծանրաբեռնվածության և կայուն է մաշվածության նկատմամբ: Ինչպես նաև կարելի է օգտագործել այնպիսի տեղերում, որտեղ մարդկանց շատ հոսք է լինում:
1-ին դասի կերամոգրանիտները խորհուրդ չի տրվում օգտագործել որպես հատակի ծածկույթ, քանի որ այն ունի մաշվածության հակում։ Այդ պատճառով դրանք նախատեսված են պատերի երեսպատման համար:
Կերամոգրանիտի Աստիճանները
Կերամոգրանիտը լինում է նաև 3 աստիճանի: Աստիճանը պետք չէ շփոթել դասի հետ։ Վերջինս ցույց է տալիս հակումը մաշվածության նկատմամբ, իսկ աստիճանը ցույց է տալիս կերամոգրանիտի որակը` կապված հաստության հետ:
Ամենալավ ու բարձր աստիճանը 1-ինն է , որը նաև ամենահաստ տեսակն է (մինչև ¾”): 3-րդ աստիճանը ամենաբարակն է (մինչև ¼”), 3-րդ աստիճանի սալիկը խորհուրդ չի տրվում հատակի երեսպատման համար, հատկապես շատ անցուդարձ ունեցող վայրերում:
Սովորաբար պրեսգրանիտների ջրակլանելիությունն ընկած է 0.5 % -ից մինչև 3 % սահմաններում:
Մետլախի Պատրաստման Գործընթացը
Սալիկի նյութերի հսկայական բազմազանության մեջ առանձնահատուկ տեղ են զբաղեցնում մետլախի սալիկները։ Եթե դուք փնտրում եք հատակի կամ պատի յուրօրինակ ծածկույթ, որը կարող է լրացնել գրեթե ցանկացած ինտերիեր, մետլախի սալիկները հենց այն է, ինչ ձեզ հարկավոր է:
Մետլախե սալիկները պատրաստվում են հատուկ հրակայուն կավից՝ ավելացնելով բնական գունանյութեր։ Ճնշման տակ կաղապարելուց հետո սալիկների արտաքին շերտը ջնարակվում է (էմալապատվում է):
Չորանալուց հետո այն ենթարկվում է բարձր ջերմային ազդեցության։ Թրծումը տեղի է ունենում ջերմաստիճանի աստիճանական աճով ( 200-ից մինչև 1180 ° C ջերմաստիճան), որի արդյունքում ստացվում է շատ դիմացկուն նյութ:
Ջնարակը (էմալը) արտադրանքի մակերեսին կարելի է քսել ինչպես թրծելուց առաջ, այնպես էլ դրանից հետո։ Վերջին դեպքում սալիկները կրկին թրծվում են (այսպես կոչված՝ կրկնակի թրծմամբ սալիկներ): Եթե ջնարակը քսվում է շերտերով (մի քանի անգամ), ապա յուրաքանչյուր շերտ ամրացվում է թրծմամբ։
Բացի այդ, մետլախը չի վախենում ջերմաստիճանի փոփոխություններից, մասնավորապես սաստիկ սառնամանիքներից, խոնավությունից և քիմիական նյութերի ազդեցությունից, հետևաբար այն հարմար է ինչպես ներքին, այնպես էլ արտաքին հարդարման համար:
Տպավորիչ են նաև խտության բնութագրիչները՝ մետլախի սալիկները կարող են դիմակայել 3,2 - 5,5 հազար կգ ճնշման։
Մետլախի Առավելությունները
Շուկայում մետլախների նախշերի և երկրաչափական համադրությունների շատ տարբերակներ կան: Նախշերը կարող են լինել երկրաչափական, ծաղկային, խճանկարային, վերացական կամ արևելյան թեմաներով:
Մետլախի այլ առավելությունները ներառում են՝
Ծառայում են տասնամյակներ առանց վնասվելու՝ 30-ից 100 տարի
Խոնավադիմացկուն են
Չեն պահանջում բարդ խնամք, դրանց հետ կարելի է օգտագործել գրեթե ցանկացած մաքրող միջոց
Երկար ժամանակ պահպանում է իր սկզբնական գույնը
Հեշտ տեղադրվում է ինչպես հատակին, այնպես էլ պատին
Քերծվածքները հազվադեպ են առաջանում և գրեթե անտեսանելի են
Մետլախի սալիկները չեն վախենում խոնավությունից, կանխում են խոնավության առաջացումը, ինչպես նաև սնկերի և բորբոսի առաջացումը:
Մետլախի Թերությունները
Մետլախը բավականին սառը ծածկույթ է, և այնքան էլ հաճելի չէ դրա վրա բոբիկ ոտքերով քայլելը։
Բացի այդ, կարող են առաջանալ տեղադրման որոշակի բարդություններ։ Քանի որ սալիկների հաստությունները տարբեր են, սալիկապատման ժամանակ պետք է հետևել, որպեսզի սալիկապատվող տարածքի արտաքին մակերևույթը նույն մակարդակի վրա լինի:
Կան նաև սալիկների կտրման հետ կապված բարդություններ։ Ինչպես նաև, առանց պրոֆեսիոնալ դիզայների շատերը դժվարանում են ինքնուրույն ստեղծել գրագետ դիզայն:
Երբեմն, ջնարակի վրա կարող են առաջանալ խազեր և ճաքեր։ Դա տեղի է ունենում մեխանիկական ազդեցությունների հետևանքով կամ եթե սալիկն ընտրվել է առանց աշխատանքային պայմանները հաշվի առնելու։
Այս սալիկներն օգտագործվում են բացառապես ներքին մակերեսները հարդարելու համար։
Ո՞ր Մեկն Ընտրել՝ Կախված Վերանորոգվող Տարածքից
Մասնագետները տան վերանորոգման դեպքում երկու տեսակն էլ առաջարկում են՝ կախված Ձեր բյուջեից և նյութերի արտաքին տեսկի նախընտրություններից։ Այնուամենայնիվ, առավել հեշտ կողմնորոշման համար կարող եք օգտվել հետևյալ տարանջատումից։
Մետլախն առավել հաճախ օգտագործվում է բնակելի, ոչ մեծ տարածքների պատերի և հատակի ձևավորման համար։ Այն առավել մատչելի է քան կերամոգրանիտը, և տան պայմաններում հիմնականում որակային հատկանիշներով չեք զգա տարբերություն։ Նաև, մետլախն ավելի հեշտ և արագ է հավաքվում, այնպես որ եթե ժամանակի սղության կարիք ունեք, ցանկալի է ընտրել այս տարբերակը։
Կերամոգրանիտ սովորաբար ընտրում են առավել մարդաշատ վայրերի համար, օրինակ առևտրի սրահներ, կոմերցիոն տարածքներ։ Նման վայրերը պատկանում են այն կատեգորիայի տարածքներին, որոնք պահանջում են հատակի նյութերի հատուկ հատուկ դիմացկունություն։ Այսպիսի սրահների հատակներին պարբերաբար հավաքվում են փողոցից բերվող կեղտը, փոշին ու խոնավությունը, ուստի բացի դիմացկունությունից, սալիկները պետք է չմաշվեն քիմիական նյութերով և խոզանակներով հաճախակի մաքրումից:
Նաև, կերամոգրանիտը կարող է օգտագործվել տան տարածքից դուրս՝ արտաքին միջավայրում։
Դրսի, Թե՞ Ներսի Տարածք եք Ցանկանում Սալիկապատել
Այսպես, քանի որ այս երկու հատակները բավականին նման առանձնահատկություններ ունեն, փորձենք տարանջատել դրանք ըստ ներսի կամ դրսի տարածքների սալիկապատման հարմարավետության։
Կերամոգրանիտե սալիկները շատ լավ են դիմակայում բարդ կլիմայական պայմաններին։ Այդ պատճառով՝ բաց տարածքները սալիկապատելու ամենահարմար տարբերակն են համարվում։
Կերամոգրանիտե սալիկները կարող են շատ ավելի լավ դիմակայել ջերմությանը և ջերմաստիճանի փոփոխություններին: Դրանք նաև էկոլոգիապես մաքուր են, ունեն առավել բարձր խտություն, քան կերամիկական սալիկները։ Դրանք նաև ավելի քիչ ծակոտկենություն ունեն մետլախի հետ համեմատած, ինչը նշանակում է, որ մետլախե սալիկները համեմատաբար առավել արագ կարող են քայքայվել դրսի ազդեցություններից:
Ամեն դեպքում պետք է հաշվի առնել, որ սալիկապատված հատակների ամենախոցելի տեղը նրանց քսահարթումն (затирка) է, որը տեղումների և ջերմային խիստ տատանումների ազդեցության տակ քայքայվում և փչանում է: Այս խնդիրը լուծելու համար պետք է ձեռք բերել անհրաժեշտ հատկություններով (խոնավադիմացկունություն, ցրտադիմացկունություն և մաշվածադիմացկունություն) օժտված քսանյութեր:
Վերը նշվածից պարզ է դառնում, որ շինություններիս դուրս տարածքների հարդարման համար կերամոգրանիտն առավել հարմար տարբերակ է։ Դե իսկ շինության ներսում օգտագործման համար՝ երկու տարբերակն էլ հարմար են։
Վերջում, թեև սա կարող է անկարևոր դետալ թվալ, կերամոգրանիտն առավել ծանր է, քան մետլախը։ Եթե սալիկապատվող նյութը վերևի հարկեր բարձրացնելու խնդիր կա՝ ծանրության հետ կապված, ցանկալի է մետլախ ընտրել։
Ամփոփում
Շատ դեպքերում ոչ մասնագիտական աչքով նայելիս, Դուք որևէ տարբերություն չեք գտնի մետլախի և կերամոգրանիտե սալիկների միջև։ Դրանք երկուսն էլ հասանելի են տարբեր գույներով, չափսերով, մակերևույթի տեսակներով, և երկուսն էլ քարի կոնսիստենցիա ունեն։
Եթե խոսենք տան կահավորման մասին, շատ հաճախ մեծ տարբերություն էլ չկա՝ թե կոնկրետ որն ընտրել։ Երկու տեսակներն էլ բավականին տարածված են ժամանակակից գնորդների կողմից և առավել ճաշակի հարց են, քան բաղադրության ու հատկանիշների տարբերության։
Հստակ առավելություններ կամ թերություններ ի հայտ են գալիս որոշակի հստակ դեպքերում՝ երբ ցանկանում եք սալիկապատել դրսում գտնվող հատակ, շատ մարդաշատ տարածք, և այլն։
Կերամոգրանիտն առավել դիմացկուն և շենքերից դուրս գտնվող տարածքներին առավել հարմար նյութ է, մինչդեռ մետլախը առավել ցանկալի է օգտագործել շենքի ներսում։
