Շատ լսած կլինեք, որ վարագույրների տեղադրումով ավարտվում է սենյակի ներքին հարդարանքը։ Վարագույրները անփոխարինելի տարր են ժամանակակից բնակարանի, տան կամ գրասենյակի ինտերիերում, որոնց օգնությամբ կարող եք փոխակերպել սենյակի ամբողջ տեսքը և ստեղծել ցանկացած միջավայր:
Վարագույրները ոչ միայն պաշտպանում են արևից, այլ նաև կարող են տաքացնել սենյակը, թաքցնել հարդարման թերությունները: Իսկ լիարժեք էսթետիկ տեսքի համար՝ նյութի և մոդելի ընտրության ժամանակ պետք է հավատարիմ մնալ սենյակի ընդհանուր ոճին և նպատակին:
Անհամապատասխան վարագույրները կարող են գեղեցիկ զարդարված սենյակը դարձնել խառնաշփոթ, նույնիսկ լավ վերանորոգման և բարձրորակ կահույքով կահավորման պարագայում:
Այս հոդվածը կօգնի հեշտացնել վարագույրների ընտրության մարտահրավերը:
Ո՞ր Սենյակի Համար եք Ընտրում Վարագույր
Բնականաբար, վարագույրները գնելուց առաջ, պետք է հաշվի առնել, թե որտեղ և ինչ դեր է այն կատարելու. արդյոք վարագույրը գնում եք ննջասենյակի համար, որտեղ ցանկանում եք փակել լույսը և թափանցիկությունը, թե, օրինակ, հյուրասենյակի՝ որտեղ փորձում եք ավելի ոճային դարձնել ինտերիերի դիզայնը:
Նախքան վարագույրներ գնելը շատ ցանկալի է ընտրել վարագույրի որոշ ոճային գաղափարներ: Վարագույրները բազմաֆունկցիոնալ են և կարող են համընկնել գրեթե ցանկացած դեկորի ոճի հետ:
Որպես առաջին քայլ, ուսումնասիրեք պատրաստի ինտերիերային գաղափարներ և խորհրդակցեք մասնագետների հետ։ Փորձեք ֆիլտրել Ձեզ ամենաշատ դուր եկող վարագույների տեսակները՝ ըստ համապատասխանության կոնկրետ սենյակի և գործառույթի։ Սա կհեշտացնի Ձեր գործը վարագույների խանութների բազմատեսակության մեջ կողմնորոշվելու համար։
Վարագույրների Տեսակները՝ Կախված Կտորի Կառուցվածքից և Ձևից
Դասական
Վարագույրների դասական տարբերակը սիմետրիկ, ուղղանկյուն վարագույրներն են՝ հավասար ծալքերով: Սովորաբար, դրանք մինչև հատակ հասնող երկարությամբ մոդելներ են, որոնք ծածկում են պատուհանի ամբողջ լայնությունը: Որպես նյութ օգտագործվում են թանկարժեք գործվածքներ՝ մետաքս, ժակարդ, ատլաս և այլն։ Դասական վարագույրները զարդարվում են կծիկներով, ծոպերով, թեփուկներով և լամբրեքիններով: Մոդելը հարմար է նեոկլասիկական, բարոկկո, ռոկոկո, կայսրական ոճերի համար։
Գլանային Մոդելներ
Գլանային մոդելները ուղիղ ժապավեն են, որի ներքևի մասում ամրացվում է ծանրացնող նյութ: Գլանային վարագույրները հավաքվում են գլանափաթեթի մեջ պատուհանի շրջանակի վերևում և զբաղեցնում են նվազագույն տարածք:
Դրանք լինում են զսպանակային, շղթայով կամ ավտոմատացված մեխանիզմով և ունենում են տարբեր գույներ և նախշեր: Ըստ իրենց կառուցվածքի՝ դրանք լինում են կասետային և բաց։
Առաջիններն ավելի թանկ արժեն և պարտադիր ունենում են ուղղորդիչներ։ Հանրաճանաչ տարբերակ է ցերեկ-գիշեր մոդելը, որը բաղկացած է թափանցիկ և հաստ գործվածքի համադրումից։
Գլանային վարագույրները հարմար են բարձր տեխնոլոգիաների, տեխնո, ժամանակակից և մինիմալիստական ինտերիերի համար: Նեոկլասիցիզմում թեթև գլանաձև վարագույրները կարելի է փոխարինել շղարշե վարագույններով։ Էկո ոճում գործվածքի փոխարեն օգտագործվում են բամբուկի կամ կտավատի մանրաթելեր։
Հռոմեական
Հռոմեական մոդելը նման է գլանափաթայինին մի քանի տարբերությամբ: Գործվածքը բաժանված է հավասար մասերի՝ կոշտ նյութի, մի քանի կարված ուղղահայաց շերտերով:
Հռոմեական վարագույրների տեսակներից են դասականը, երբ վարագույրը բարձրանում է և հավաքվում է ծալքերի մեջ (ակորդեոն ոճ) և կասկադայինը, երբ ծալքերը մնում են նույնիսկ այն ժամանակ, երբ վարագույրն ամբողջությամբ բացվում է: Այս վարագույրներն օգտագործելու դեպքում հնարավոր է կարգավորել սենյակ մտնող լույսի քանակը՝ վարագույրը ցանկալի երկարությամբ բացելու միջոցով:
Գույների և հյուսվածքների բազմազանության շնորհիվ հարմար է ցանկացած ինտերիերի համար:
Ճապոնական
Ճապոնական մոդելն ունի ուղիղ, ուղղահայաց, էկրանային վահանակներ՝ ծածկված գործվածքով: Վարագույնները շարժվում են կախված ուղղորդիչներով: Հարմար է մեծ համայնապատկերային պատուհանի համար։ Ներքևի հատվածում ամրացվում է ծանրացնող նյութ, ուստի վարագույրը միշտ գտնվում է կատարյալ ուղիղ վիճակում: Ճապոնիայում նման վարագույրները կոչվում են էկրաններ և օգտագործվում են տարածքը գոտիավորելու համար: Պարզ մոդելները օգտագործվում են մինիմալիստական ինտերիերում:
Ֆրանսիական
Ֆրանսիական մոդելը հիշեցնում է ջրվեժ, որը պատրաստված է գործվածքների ծալքերից: Տեքստիլ գործվածքները հաճախ զարդարվում են ուլունքներով, ժանյակներով և առաձգական շղարշով: Վարագույրի աշխատանքը իրականացվում է պտտվող շղթայի մեխանիզմով։ Որքան շատ է ձգվում գործվածքը, այնքան այն ավելի շքեղ է դառնում։ Նախկինում ֆրանսիական վարագույրները օգտագործվում էին ամրոցների և պալատների պատուհանները զարդարելու համար, ուստի այս վարագույրի տարբերակը իդեալական է կայսերական ոճով սենյակի համար:
Ավստրիական
Ավստրիական մոդելը կազմված է երկար ժապավենից, ներքևի մասում թաղանթներով: Այս տեսկի վարագույրները նման են ֆրանսիական մոդելին, սակայն, ի տարբերություն վերջինիս, վարագույրի ժապավենի վրա ծալքեր են ձևավորվում միայն վարագույրը բարձրացնելիս։ Վարագույրի ժապավենի վերին մասը մնում է հարթ, իսկ ներքևում հատվածում վարագույրը հավաքվում է։ Սա հանրաճանաչ մոդել է դասական ոճում:
Անգլիական
Անգլիական մոդելը նման է ավստրիականին։ Այս տեսակ վարագույրների համար օգտագործվում են ավելի լայն գործվածքներ՝ ոչ միայն հորիզոնական, այլև հակադարձ ուղղահայաց ծալքերով։ Կասկադային վարագույրներն առանձնանում են իրենց լակոնիզմով և հանգիստ ձևով։ Հեշտությամբ համապատասխանում են բնական, փայտե կահույքով հարդարված սենյակներին։
Ծալքերով
Ծալքավոր մոդելը նման է շերտավարագույրներին՝ գործվածքների ծալքերի շնորհիվ: Սա գործնական և ֆունկցիոնալ մոդել է: Վարագույրի շերտերը դիմացկուն են կեղտի և փոշու նկատմամբ, չեն խամրում արևի տակ՝ երկար ժամանակ պահպանելով իրենց սկզբնական տեսքը։ Նման վարագույրը գերազանց կերպով արգելափակում է լույսի ներթափանցումը: Հարմար է փոքր պատուհանների համար և կարելի է տեղադրել պատուհանի բացվածքի ցանկացած բարձրության վրա։
Թելային
Մուսլին կամ թելային վարագույրները տարբեր հյուսվածքների թելեր են՝ միահյուսված միմյանց հետ։ Օգտագործվում են էթնիկ ոճի, բարձր տեխնոլոգիաների, նեոկլասիկական ինտերիերում: Հատկապես ստեղծագործական տեսք ունեն ուլունքներով և ապակե ուլունքներով վարագույրները: Թելային վարագույրները չեն պաշտպանում արևից, ինտերիերում դեկորատիվ դեր են կատարում։ Հարմար են նաև տարածքի գոտիավորման համար։ Հաճախ մոդելը կախում են մահճակալի կամ դռան մոտ:
Իտալական
Այս մոդելները նման են դասական վարագույրներին: Բայց եթե դասական տարբերակում վարագույրներն ազատորեն շարժվում են պատուհանի լայնությամբ, ապա իտալական տարբերակում հնարավոր չի լինի ամբողջովին բացել վարագույրը։ Վարագույրները ամրացված են, սենյակ ներթափանցող լույսի քանակը կարգավորվում է կապանքների կամ լարերի միջոցով, որոնք ձգվում են դեպի քիվի անկյունները։
Սրճարանային
Նման վարագույրները ոչ ստանդարտ ձևի գործվածքից են պատրաստվում: Այս վարագույրների տեսակներից է կրճատված տարբերակը: Այս դեպքում վարագույրը ծածկում է պատուհանի միայն ստորին և (կամ) վերին հատվածը, ամբողջ պատուհանի վարագույրի շերտերը հավաքվում են մեջտեղում տեքստիլ ժապավենով: «Սրճարանն» ամրացված է պատուհանի բացվածքին կամ շրջանակին։ Հաճախ օգտագործվում է գեղջուկ տիպի սենյակ զարդարելու համար:
Վարագույրներն Ըստ Գործվածքի Տեսակի
Գործվածքների բազմազանության մեջ, որոնցից կարելի է կարել վարագույրներ, կան մի քանիսը, որոնք առավել պահանջարկ ունեն: Բնական հիպոալերգիկ գործվածքները կարող են տարբեր ծագում ունենալ:
Վուշից
Վուշից գործվածքը երկարակյաց նյութ է, որը հիանալի պաշտպանում է արևի լույսից: Այն օգտագործվում է սովորական վարագույրների պատրաստման համար: Էկո-ոճի սիրահարները հաճախ սիրում են միաշերտ վուշի գործվածքից վարագույրներ կախել, որպեսզի նյութի հյուսվածքը տեսանելի լինի լույսի ներքո: Գործվածքը բավականին զգայուն է լվացվելու նկատմամբ և կարող է փոքրանալ չափերով լվացքից հետո, ուստի խորհուրդ է տրվում այն մշակել գոլորշիով և թողնել ավելցուկ որոշակի երկարություն։
Բամբակյա
Բամբակն ամրության առումով կարող է լինել վուշին համանման։ Բամբակյա վարագույրները հաճախ պատրաստվում են պոլիեսթերի հետ համատեղ և ավելի ճկուն են։ Նման արտադրանքի թերությունը դրա այրման մեծ հավանականությունն է: Խորհուրդ է տրվում կախել նման վարագույրներ, եթե պատուհանները նայում են դեպի հյուսիս, քանի որ այս կողմում արևը այնքան ինտենսիվ չի լուսավորում և տաքացնում սենյակը։
Կենդանական Ծագում Ունեցող Գործվածքներ
Մետաքսե
Սա շատ քմահաճ և թանկարժեք նյութ է։ Խնամքի դժվարության և վնասվելու նկատմամբ անկայունության պատճառով խորհուրդ է տրվում ընտրել այն սենյակի համար, որտեղ չկան կենդանիներ կամ երեխաներ: Մետաքսե վարագույրները ննջարանում շատ էսթետիկ տեսք ունեն՝ սենյակի մթնոլորտին հաղորդում են ռոմանտիկ տեսք:
Բրդյա
Բրդի մանրաթելերից գործված վարագույրները պետք է պաշտպանված լինեն արևի լույսից: Հակառակ դեպքում, դրանք գունաթափվում են արևի լույսի հետ հաճախակի շփումից։
Սինթետիկ և Կիսասինթետիկ Գործվածքներ
Նման գործվածքները տեքստիլ շուկայում ամենատարածվածն են վարագույրների համար։
Վիսկոզա
Այս գործվածքը հայտնի է մաշվածության նկատմամբ ավելի մեծ դիմադրողականությամբ, քան բամբակը: Այն ստանում են բնական նյութերի քիմիական մշակման արդյունքում։ Տեսողականորեն այս գործվածքները նման են, բայց վիսկոզան, հատկապես պոլիեսթերի հետ համակցված լինելու դեպքում, շատ ավելի երկար կծառայի:
Պոլիեսթեր
Այս տեսակը հիմնականում օգտագործվում է տարբեր գործվածքներից պատրաստված վարագույրների երեսպատման համար։ Այն կանխում է ուլտրամանուշակագույն ճառագայթների ավելորդ քայքայիչ ազդեցությունը վարագույրի վրա: Ավելի արդիականացված տարբերակի դեպքում նման գործվածքը կարող է նույնիսկ վանել ջուրն ու կեղտը։ Պոլիեսթերով երեսպատելու պարագայում, այն ծառայում է որպես սառը և տաք օդի և փողոցից եկող աղմուկի մեկուսացում:
Բլեքաութ
Blackout-ը դարձել է նորարարություն նրանց համար, ովքեր ցանկանում են հիմնովին պաշտպանվել արևի լույսից վարագույրի միջոցով: Այն խիտ կտոր է, որը կցվում է հիմնական վարագույրների գործվածքին՝ օգտագործելով կեռիկներ կամ կպչող ժապավեն: Միաշերտ Blackout-ը հիմնականում ծառայում է որպես գործվածքների պաշտպանություն: Սենյակը զգալիորեն մթնեցնելու համար օգտագործում են գործվածքի 2 շերտ, որոնցից առաջինը լինում է սև։ Բացի հիմնական տեսակներից, մշակվում են մոդելներ, որոնցում մուգ գործվածքը մտնում է տարբեր նախշերով զարդարված գունավոր շերտերի մեջ:
Թափանցիկ Շղարշ
Շղարշե (тюль) վարագույրները խորհուրդ է տրվում կախել այն սենյակներում, որոնք ավելի շատ լույսի կարիք ունեն։ Այս թափանցիկ ու նրբագեղ գործվածքից պատրաստված վարագույրները հիանալի կերպով կծառայեն որպես շղարշ, որը կարելի է համադրել ավելի հաստ վարագույրների հետ։
Գոբելեն
Գոբելենը, դիպակը և մուսլինը համեմատաբար քիչ պահանջկոտ տեքստիլ նյութերն են: Նրանք չեն խամրում լույսի ազդեցության տակ, պաշտպանում են սենյակը արևից, հաճելի են դիպչելիս և դիմացկուն են։
Վարագույներն Ըստ Գունային Երանգների
Վարագույրների երանգը պետք է համապատասխանի սենյակի գունային սխեմային և բնակարանի դասավորությանը: Վարագույրները կարող են վառ շեշտադրություն դառնալ սենյակում՝ ճիշտ ընտրված գունային համադրության արդյունքում:
Եվ այսպես, փորձենք քննարկել՝ ինչ հիմնական գույներ կարելի է ընտրել՝ ըստ ինտերիերի։ Առավել նեղ ընտրությությունն, իհարկե, կախված է միայն Ձեզնից։
Հագեցած՝ Մուգ Գույներ
Այս դեպքում ընտրվում են վարագույրի հագեցած գույները, որոնք կրկնվում են նաև ինտերիերի դետալներում՝ ծածկոցներ և վերմակներ, բազմոցի կամ մահճակալի վրայի բարձերի երեսներ, կահույքի պաստառագործության երանգներ, գորգեր, նկարների շրջանակներ, պաստառների նախշեր, լամպերի հիմքեր։
Ունիվերսալ Գույներ
Հանգիստ ինտերիեր ստանալու համար ցանկալի է ընտրել ունիվերսալ գույներ՝ սպիտակ, բաց մոխրագույն, կաթնագույն, բաց դարչնագույն, բաց դեղնագույն:
Կարելի է ընտրել պատի ձևավորման գույնի՝ մեկ կամ երկու երանգ ավելի բաց կամ մուգ գույն: Այս լուծումը իդեալական է փոքր տարածքների համար:
Միագույն ինտերիերի համար նախընտրելի են նախշավոր վարագույրները:
Հյուսիս նայող պատուհանները զարդարելու համար ավելի լավ է տաք գույներով վարագույրներ օգտագործել:
Արևոտ, հարավային սենյակների համար հարմար են բարձր խտությամբ գործվածքների սառը երանգներ:
Նախքան Վարագույրի Տեղադրումը
Ճիշտ վարագույրներ ստանալու ամենակարևոր քայլերից մեկը ճիշտ չափագրումներ կատարելն է: Վարագույրները չափելու համար անհրաժեշտ է հետևել այս հինգ պարզագույն քայլերին.
Որոշել տեղադրման վայրը և դիրքը,
Որոշել վարագույրի քիվի երկարությունը,
Ընտրել վարագույրի երկարությունը,
Չափել լայնությունը,
Չափել երկարությունը:
Նախքան վարագույրների կախելը, կարևոր է իմանալ որոշ մանրամասներ: Վարագույրների տեղադրումը դժվար չէ, բայց նախապես պահանջում է որոշակի նախապատրաստում: Ահա վարագույրի տեղադրման հիմնական քայլերը.
Պետք է նշել, թե ուր է հասնելու քիվը,
Որտեղ պետք է լինեն քիվի անցքերը,
Տեղադրել քիվը,
Կցել վարագույրը քիվին,
Տեղադրել քիվի պարագաները:
Ընդհանուր Խորհուրդներ Վարագույր Ընտրելու Համար
Ժամանակը ցույց է տվել, որ որոշ վարագույրներ ունիվերսալ ընտրություն են որոշակի հստակ դեպքերում։
Օրինակ՝ երկար վարագույրները հիանալի տեսք ունեն հյուրասենյակներում և ննջասենյակներում: Այնուամենայնիվ, դրանց օգտագործումը նպատակահարմար չէ խոհանոցի համար: Խոհանոցի պատուհանները սովորաբար զարդարվում են ավելի կարճ վարագույրներով:
Պոլիեսթեր վարագույրները սովորաբար լավ են աշխատում ննջասենյակներում, բայց չեն աշխատում խոհանոցների համար, քանի որ նյութը դյուրավառ է և ներծծում է հոտը: Մինչդեռ սպիտակ վարագույրը հիանալի տեսք ունի խոհանոցում:
Վարագույրների ձողերը պատուհանի գեղեցկությունը ապահովող բանալին են: Եթե դրանք չափազանց բարձր կամ ցածր են տեղադրված կամ պատուհանի համար սխալ չափսեր են ընտրված, ապա այն կարող է էապես ազդել սենյակի ինտերիերի վրա :
Ընդհանրապես, վարագույրները պետք է տեղադրվեն պատուհանի շրջանակից 5-ից 7 սմ բարձրության վրա: Այնպես որ վարագույր ընտրելիս, ճիշտ կլինի նախապես որոշել նաև քիվի դիզայնը և գույնը: Կարևոր է նաև քիվը ամրացնել ճիշտ վայրում, ինչով կապահովեք դիզայնի ընդհանուր ներդաշնակությունը:
Ամփոփում
Վարագույրները տան վերջին շտրիխն են՝ այն գեղեցիկ <<փաթեթավորումը>>, որը տան տեսքը դարձնում է ավարտուն։ Դրանց ընտրությունը մի կողմից շատ սուբյեկտիվ է՝ կախված տանտիրոջ ճաշակից, մյուս կողմից որոշ կանոններ կան, որոնք երաշխավորում են վարագույրի և սենյակի ինտերիերի ճիշտ համադրությունը։
Սույն հոդվածում նշած կանոններն ու խորհուրդները կօգնեն Ձեզ ճիշտ ընտրություն կատարել տան ինտերիերի այս կարևոր դետալի ընտրության հարցում։
