Ներկերի հիմնական տեսակներն ու դրանց տարբերությունները

Ներկերը շենքերի արտաքին և ներքին հարդարման տարրեր են, որոնք ունեն լայն կիրառություն շինարարության, վերանորոգման և դիզայներական աշխատանքներում։ Գոյություն ունեն ներկերի բազմաթիվ տեսակներ, որոնցից յուրաքանչյուրն ունի իր կիրառման առաձնահատկությունը։

Ինչպե՞ս կարելի է կանխել ներկի գունաթափումը, ճաքելը կամ բշտիկների առաջացումը: Ի՞նչ պետք է իմանաք ներկելուց առաջ և ինչպես ընտրել ներկը: 

Այս հոդվածը անդրադարձել է ներկերի հիմնական առանձնահատկություններին։ 

Ներկերի Լայն Կիրառությունը

Առհասարակ՝ ներկերը մեր կյանքում կարևոր տարր են՝ տարածված ոչ միայն շինարարության մեջ։

Ներկերը ոչ միայն գույն ու գեղեցկություն են հաղորդում առարկաներին, այլև պաշտպանում են դրանք արտաքին ազդեցություններից։ Ներկը լավ միջոց է տարբեր տեսակի մակերեսները շրջակա միջավայրի անբարենպաստ գործոններից (փոշի, խոնավություն, ջերմաստիճանի փոփոխություններ, վնասակար միկրոօրգանիզմներ) պաշտպանելու, ինչպես նաև դրանց ցանկալի հատկություններ տալու համար: 

Ներկեր օգտագործվում են կյանքի գրեթե բոլոր բնագավառներում՝ սննդարդյունաբերությունում, տեքստիլ արդյունաբերությաունում, մեքենաշինությունում, գեղանկարչությունում, տպագրությունում, կոսմետիկայի արտադրությունում, կահույքի (փայտե առարկաների)արտադրության մեջ, ճանապարհների գծանշման ժամանակ, սանտեխնիկայի արտադրության մեջ, շինարարության մեջ և այլն: 

Այս հոդվածում մենք կանդրադառնանք հենց շինարարական ոլորտում օգտագործվող ներկերին, որոնցից յուրաքանչյուրն ունի իր առանձնահատկությունները և կիրառման իր շրջանակը: 

Օրինակ՝ ինտերիերը թարմացնելու համար երբեմն բավական է պատերը վերաներկել։ Նոր երանգները կարող են բավականին թարմացնել սենյակը, նույնիսկ եթե այլ զգալի շտկումներ չեն կատարվել։ 

Օգտագործելով համապատասխան ներկանյութ՝ հնարավոր կլինի  տեսողականորեն մեծացնել սենյակի տարածքը, կատարել ակցենտային շեշտադրումներ, ընդգծել ճարտարապետական ​​առանձնահատկությունները և ներկայացնել օրիգինալ դիզայներական լուծումներ:

Բայց մինչ այդ պետք է ընտրել, թե ինչպիսի ներկ է  անհրաժեշտ այս կամ այն աշխատանքն իրականացնելու համար: 

Ներկերի Տեսակներն Ըստ Ներկվող Մակերևույթի

Ներկերի շատ տեսակներ կարող են կիրառվել միանգամից մի քանի օբյեկտներ ներկելու համար։ Օրինակ՝ հնարավոր է գտնել ներկ, որը կարող է հավասարապես կիրառելի լինել փայտե և բետոնե մակերեսների համար։ 

Ընթերցողին առավել հարմար լինելու համար, ներքոնշյալ ներկերի տեսակները խմբագրված են ըստ ներկվող մակերեսների տեսակների։ 

Դասակարգումից հետո՝ առավել ներքևի հատվածում, կարող եք գտնել ամեն ներկի առավել մանրամասն նկարագրությունը։ 

Շինությունների Ներսի Պատերի Համար Օգտագործվող Ներկեր

Սովորաբար, նման ներկերը չեն թաքցնում պատերի թերությունները։  Ընդհակառակը՝  դրանք կարող են ավելի ընդգծել անհարթությունները: Հետևաբար, մինչ ներկման պրոցեսին անցնելը անպայման պետք է իդեալական հարթեցնել տան ներսի մատերը գաջով, գիպսոնիտով կամ ծեփամածիկով : Դրանից հետո, կախված  սենյակի խոնավության աստիճանից, կարելի է ընտրել հետևյալ ներկերից մեկը.

 Ջրաէմուլսիոն ներկեր (էմուլսիոն). Սրանք այնքան էլ չեն դիմանում խոնավության ազդեցությանը, ուստի խորհուրդ է տրվում օգտագործել չոր սենյակների համար։ 

• Ակրիլային լվացվող ներկեր. Դիմանում են խոնավության ազդեցությանը, ինչը հնարավորություն է տալիս մակերեսը լվանալ խոնավ շորով և վստահ լինել որ դա չի նվազեցնի գույնի պայծառությունը։ 
• Սիլիկատային ներկեր.Այս ներկերի օգտագործումից հետո կարող եք վստահ լինել, որ պատի վրա բորբոս և սունկ չի առաջանա:
• Սիլիկոնային  ներկեր.  Սրանք փոշին չեն ձգում և անհրաժեշտության դեպքում կարելի է լվանալ։ 
• Ալկիդային ներկեր. Այս ներկերը երկար են պահպանվում և կարող են օգտագործվել բարձր խոնավությամբ սենյակներում։
• Յուղաներկեր և նիտրո ներկեր. Չնայած ներկայումս այս ներկերը գործնականում շատ քիչ են օգտագործվում, դրանք կիրառելի են ներսի պատերի համար։
• Լատեքսային ներկեր. Ունեն բարձր խոնավադիմացկունություն։

Շինությունների Դրսի Պատերի Համար Օգտագործվող Ներկեր

Արտաքին պատի ներկերը օգնում են պայծառացնել շինությունից դուրս կանգնած բետոնե, քարե, պեմզաբլոկե և սվաղված ձանձրալի, մոխրագույն պատերը։ Դրանք օգնում են պատին ավելացնել դեկորատիվությունը, վերածել դրանք շինարարական տեսքից ավարտուն տեսքի։ Բացի այդ՝ ներկերը նաև օգտագործվում են արտաքին պատերի հիմքը պաշտպանելու համար: Չնայած այն հանգամանքին, որ բետոնը բավականին դիմացկուն նյութ է, այն ենթակա է ժամանակի ընթացքում քայքայման:

Այս տիպի պատերը ներկելու համար խորհուրդ են տրվում հետևյալ ներկերը.

• Ջրաէմուլսիոն 
• Լատեքսային 
• Յուղաներկեր
• Նիտրոներկեր
• Ալկիդային 
• Ակրիլային 
• Սիլիկոնայն 
• Սիլիկատային

Շինությունների Երկաթե Մակերեսների Համար Օգտագործվող Ներկեր

Որպեսզի դրսում գտնվող երկաթե կոնստրուկցիաները  երկար ծառայեն, դրանք հատուկ պաշտպանություն են պահանջում։ Եթե ​​երկաթը պաշտպանված չէ, կոնստրուկցիան արագ կկորցնի իր սկզբնական ամրությունը: Հիմնական պատճառն այն է, որ մետաղը չի սիրում բարձր խոնավություն, քանի որ խոնավության ազդեցության տակ մետաղն օքսիդանում է և սկսում քայքայվել: Այս իրավիճակում է, որ օգտագործվում է արտաքին օգտագործման մետաղական ներկ:

Մինչ մետաղական մակերեսի վրա ֆասադային ներկի օգտագործելը անհրաժեշտ է ներկման ենթակա մակերեսը նախապատրաստել և քսել նախաներկ (грунт):  Նախաներկի օգտագործումը ոչ միայն կպաշտպանի մետաղը կոռոզիայից, այլև զգալիորեն կերկարացնի դրա ծառայության ժամկետը:

Մետաղի կոնստրուկցիաների հետ կարելի է օգտագործել հետևյալ ներկերը։ 

• Ալկիդային. Այս ներկերը ստեղծում են գերազանց, բարձր հակակոռոզիոն հատկություններով  պաշտպանիչ շերտ, քանի որ էմալն ունի երկար ծառայության ժամկետ: Այնուամենայնիվ, ալկիդային ներկերը ունեն գույնի ընտրության որոշ սահմանափակումներ:
• Ակրիլային.  Այս ներկերի հիմնական խնդիրն այն է, որ ակրիլը նոսրացվում է ջրով, իսկ մետաղը ժանգոտում է ջրից։ Բայց այս տեսակի ներկը ստեղծում է գերազանց դիմացկուն շերտ, որը կարող է դիմակայել բարձր ջերմաստիճաններին և չի փոխում գույնը ուլտրամանուշակագույն ճառագայթների ազդեցության տակ: Այսպիսով, եթե ուզում եք նման ներկ օգտագործել երկաթի մակերեսի հետ, ներկին անհրաժեշտ է ավելացնել հատուկ հավելումներ, որոնք չեզոքացնում են մետաղի փոխազդեցության գործընթացը ջրի հետ։ Իրականում՝ մետաղի կոնստրուկցիաների ներկման համար նախատեսված ակրիլային ներկերի մեծ մասն արդեն իսկ արտադրվում է այս պաշտպանիչ հավելումով։
• Նիտրոներկեր. Երկաթի մակերեսի համար նախատեսված ներկերի մեջ սրանք ունեն ցածր գին և նյութի քիչ ծախս: 
• Յուղաներկեր. էկոլոգիապես մաքուր են և չունեն սուր հոտ: Յուղաներկը առանձնահատուկ ժողովրդականություն է վայելում իր ցածր գնի շնորհիվ: Սակայն համեմատած մյուս ներկերի սրանք ունեն ամենաքիչ ծառայության ժամկետը: Արևի ազդեցության տակ ներկը գունազրկվում է և կորցնում է փայլը: Նաև, նման ներկերը ունեն նվազագույն հակակոռոզիոն ազդեցություն։ Եթե դրանով ներկել մետաղը, այն գործնականում պաշտպանված չէ խոնավությունից և շարունակում է ժանգոտվել նույնիսկ ներկի տակ: Միգուցե, հարմար լինի որպես կարճաժամկետ լուծում։

Շինությունների Փայտե Մակերեսների Համար Օգտագործվող Ներկեր 

Ինչու՞ ներկել փայտյա մակերեսը։ Բացի արտաքին տեսքից, ներկված փայտե կոնստրուկցիաները ձեռք են բերում առավել լավ որակ և երկարակեցություն: Այնուամենայնիվ, պահանջվող արդյունքը ստանալու համար միայն ներկելը բավարար չի լինի. նախ պետք է օգտագործեք հատուկ ներծծումներ և նախաներկում (грунтовка): 

Վերջիններս լցնում են փայտի ծակոտիների մեջ և հիմք են պատրաստում հետագա դեկորատիվ աշխատանքների համար: Այս նախապատրաստական գործողություններիով փայտե մակերեսը տեխնիկապես լրիվ պատրաստ է հարթ ներկվելու համար: 

Այսպես, ի՞նչ ներկ ընտրել փայտի համար:

• Անթափանց էմալներ (ալկիդային, ակրիլային). Այս ներկերը չորանալուց հետո ձևավորում են կոշտ շերտ,  որն ապահովում է դիմադրողականություն արտաքին գործոնների նկատմամբ։ Առավել մատչելին ալկիդային էմալն է։ Այն հուսալիորեն պաշտպանում է փայտե մակերեսը խոնավությունից, սակայն, համեմատության մեջ, ունի ավելի շատ թունավոր հատկություններ։
• Ակրիլային ներկեր և էմալներ. Այս ներկերը հիանալի դիմակայում են բարձր և ցածր ջերմաստիճաններին, ինչպես նաև ուղղակի ուլտրամանուշակագույն ճառագայթներին, քանի որ դրանց կազմը, որպես կանոն, ներառում է հատուկ հավելումներ (մոմ, յուղ, ուլտրամանուշակագույն ֆիլտրեր և լուսակայուն գունանյութեր): Ներկը պաշտպանում է փայտի մակերեսը խոնավությունից քայքայվելուց: Արգելվում է ջրի վրա հիմնված նյութերը պահել զրոյից ցածր ջերմաստիճանում:
• Ալկիդային ներկեր և էմալներ. Այս ներկերը գրավիչ են իրենց մատչելի գնի և երանգների բազմազանության շնորհիվ։ Նման նյութերը թույլատրվում է օգտագործել ինչպես ներքին, այնպես էլ արտաքին աշխատանքների համար, քանի որ դրանք լավ են դիմանում տեղումներին և այլ անբարենպաստ արտաքին ազդեցություններին: Այնուամենայնիվ, ներքին օգտագործման համար օրգանական լուծիչների վրա հիմնված ներկերն ավելի քիչ նախընտրելի են իրենց սուր հոտի պատճառով: Այս տեսակի նյութով մշակված փայտե կառույցները կարող են օգտագործվել նույնիսկ -30 °C-ից բարձր ջերմաստիճանում: Ներկելուց հետո, նյութը չորանում է 8-24 ժամվա ընթացքում, սակայն ներկը գրեթե չի թափանցում փայտի մանրաթելերի մեջ։ Փայտե փողոցային կառույցների, մուտքի դռների կամ պատուհանների շրջանակների համար ընդունված է օգտագործել ալկիդային միացություններ:
• Յուղաներկեր. Այս ներկերը հիանալի պաշտպանում են փայտը ջրից, բայց ծառայողական որակների առումով դրանք զիջում են այլ անալոգների: Մասնավորապես, չորանալու համար համեմատաբար երկար ժամանակ են պահանջում՝ մոտ 2 օր, ունեն ուժեղ հոտ, հաճախ առաջացնում են բծեր չորանալուց հետո։ Պետք է նաև հաշվի առնել, որ այս ներկերը վատ են համադրվում այլ ներկերի ու լաքերի հետ և ունեն առավել ցածր դիմադրողականություն մաշվածության նկատմամբ: Վերջում, չնայած շուկայում առկա են բավականին էժան յուղաներկեր, մատչելի տարբերակները շատ արագ գունազրկվում են արևի լույսի ներքո: 
• Ջրաէմուլսիոն ներկեր. Այս ներկերի հիմնական առավելություններն են հոտի բացակայությունը և շրջակա միջավայրի անվտանգությունը: Բայց դրանք հարմար չեն բացօթյա փայտե մակերեսների համար, քանի որ չեն դիմանում բարձր խոնավությանը և այլ անբարենպաստ արտաքին գործոնների: 
• Լաքեր. Հաճախ օգտագործվում են փայտե հատակը և կահույքը ներկելու համար: Այս միացությունները ոչ թունավոր են, և դրանցից առաջացած շերտը դիմացկուն է մեխանիկական ներգործության նկատմամբ և առաձգական է: Կիրառված շերտի միջով հստակ տեսանելի է փայտի հյուսվածքը: Նման նյութերը օգնում են պահպանել փայտե մակերեսի բնական տեսքը և տալիս են դեկորատիվ էֆեկտ՝ ընդգծելով մակերեսի առավելությունները։
• Պոլիեսթեր ներկեր. Այս նյութերը պատրաստվում են պոլիեսթեր խեժերի միջոցով: Դրանք թանկ են, ուստի օգտագործվում են հիմնականում փայտի վերականգնման աշխատանքների համար։ Օգտագործվում են նաև տարբեր ապրանքների դեկորատիվ մշակման համար։
• Նիտրոլաքեր. Օգտագործվում են փայտե արտադրանքի և տարրերի դեկորատիվ մշակման համար՝ տարածքի ներսում: Այս ներկերը  դյուրավառ են և չեն դիմակայում ուլտրամանուշակագույն ճառագայթների, ուստի դրանք չեն օգտագործվում դրսում: Նրանց օգտագործման հիմնական ոլորտը փայտե կահույքի և շինության ներսի տարրերի հարդարումն է:

Շինությունների Պլաստիկե Մակերեսների Համար Օգտագործվող Ներկեր

• Պլաստիկը կարելի է ներկել ջրակայուն ակրիլային էմալով: Ջրակայուն երկբաղադրիչ պոլիուրեթան-ակրիլային ներկերը հիանալի կպչում են ներկվող նյութին և դիմացկուն են գունաթափման և ուլտրամանուշակագույն ճառագայթների նկատմամբ: Դրանց հիմնական բաղադրիչը հենց ներկն է: Իսկ երկրորդ բաղադրիչը կարծրացուցիչն (отвердитель) է, որը   ակրիլային ջրային հիմքով էմալներին քիմիական և մեխանիկական ամրություն է տալիս։ Այս պոլիմերը ներկին տալիս է նաև լավ լաքե ծածկույթի դեկորատիվ տեսք, շերտի միատեսակություն, դիմադրությում մթնոլորտային և մեխանիկական ազդեցություններին: Ներկը ջրակայուն է, այն ծածկում է մշակվող մակերեսը պաշտպանիչ շերտով։ Ակրիլային ներկերը պլաստիկի համար, իրենցից ներկայացնում են նախաներկ և  և ներկ միաժամանակ, չեն պահանջում բուն ներկման մակերեսի հատուկ նախնական պատրաստում: Իհարկե, եթե այն շատ կեղտոտ չէ։ Այս տեսակի ներկը հիմնականում օգտագործվում է մեծ մակերեսներ ներկելիս։
• Վինիլային ներկ:  Վինիլային ներկերը էժան են և էկոլոգիապես մաքուր: Բայց սրանք ունեն քիչ ամրություն, և ներկայումս ավելի քիչ են օգտագործվում։
• ՊՎՔ-ի համար նախատեսված ջրային հիմքով պոլիուրեթան-ակրիլային ներկեր: Նրանք ձևավորում են ջուր վանող, մաշվածակայուն և չկպչուն  խիտ թաղանթ,  արտադրանքին տալով լրացուցիչ ամրություն և պահպանելով դրա առաձգականությունն ու ճկունությունը: 

Սալիկապատ Մակերեսների Համար Օգտագործվող Ներկեր

Շատերը վստահ են, որ սալիկներն անհնար է վերաներկել: Որոշյերը շատ կզարմանան, եթե լսեն, որ կա մետլախը ներկելու պրակտիկա առհասարակ։

Այնուամենայնիվ, երբ ​​ կարիք է առաջանում կերամիկական պատերի կամ հատակի վերանորոգման, իսկ սալիկներբ ամուր կպած  են ու դրանց քանդելը շատ ժամանակ ու ֆինանսական ռեսուրս կպահանջի, նոր երեսպատում դնելու փոխարեն կարելի է  հինը վերաներկել: 

Մինչ ներկմանն անցնելը անհրաժեշտ է մակերեսը նախապատրաստել:  Սալիկների վրայի փայլուն շերտը  նախապես պետք է մշակել մանրահատիկ հղկաթուղթով: Այնուհետև ներկվող մակերեսը պետք է լավ մաքրել և քսել  շինարարական լաք: Որից հետո պատրաստված մակերեսը կարելի է ներկել հետևյալ ներկերով.

• Ակրիլային ներկեր. Լոգարանը և խոհանոցը ներկելու համար պետք է ընտրել ջրակայուն և լվացվող բաղադրություններով ներկեր։ Այս ներկերը չունեն հոտ և  հեշտ են քսվում։ Ներկը չորանում է 1-2 ժամվա ընթացքում, ինչի արդյունքում դառնում է հավասար և հարթ:
• Լատեքսային ներկեր. Այս ներկանյութերը նույնպես ջրային հիմքով են, բայց նախորդից ավելի  ջրակայուն են։ Դրանք օգտագործվում են բարձր խոնավությամբ ցանկացած սենյակ ներկելու համար (ներառյալ սաունաները և լոգարանները): Էմուլսիան պարունակում է լատեքս, որը ծածկույթը դարձնում է դիմացկուն խոնավ սպունգով լվանալու համար, սակայն անկայուն է զրոյից ցածր ջերմաստիճանում: Սրանք լինում են անփայլ, փայլուն և կիսափայլ: Գինը համեմատաբար թանկ է, բայց ունի ծառայության երկար ժամկետ:
• Սիլիկոնային ներկեր. Ներկի բաղադրության մեծ մասը ջրում լուծվող էմուլսիաներ են: Դրանք էկոլոգիապես մաքուր են, թույլ են տալիս, որ գոլորշին թափանցի և չեն արձակում ուժեղ հոտեր։ Սիլիկոնե ներկը կարող է կիրառվել ցանկացած մակերեսի վրա։ Այն կարող է դիմակայել խոնավության և ջերմաստիճանի տատանումներին ու բորբոսին: Քանի որ ներկը կիրառվում է որպես ճակատային նյութ, այն հեշտությամբ հաղթահարում է խոհանոցի, լոգարանի և սաունայի բարձր խոնավությունը: Սիլիկոնով պատված մակերեսը վանում է ջուրն ու կեղտը, չի գունազրկվում ուլտրամանուշակագույն ճառագայթման ազդեցության տակ, ունի երկար ծառայության ժամկետ(20- 25 տարի): Թերությունը գնի թանկությունն է:
• Յուղաներկեր. Այս տարբերակը այդքան էլ տարածված չէ, քանի որ ոչ էկոլոգիական է,  գույների տեսականին բազմազան չէ: Բայց այս  ներկերը ստեղծում են խիտ ծածկույթ սալիկների վրա և ամուր են կպնում մակերևույթին: Դրանք ունեն լավ խոնավադիմացկունթյուն և մատչելի գին: Յուղաներկերը ունեն լավ ծածկողականություն և արդյունավետորեն թաքցնում են  հիմքի գույնը։ Այս որակը հատկապես արժեքավոր է նախշավոր սալիկների համար, քանի որ նախշը հաճախ երևում է, երբ ներկված է այլ ներկանյութով: Զգալի թերություն է երկար չորացման ժամանակը (3-4 օր), որն ուղեկցվում է ցնդող միացությունների գոլորշիացումից բավականին ծանր հոտով: Ծածկույթը առաձգական չէ և ժամանակի ընթացքում կարող է ճաքել ջերմաստիճանի փոփոխությունների պատճառով: 
• Էպոքսիդային միացություններ (էմալներ). Այս ներկանյութը երբ չորանում է, էմալը ձևավորում է ամուր թաղանթ, որը դիմացկուն է մեխանիկական վնասվածքների և անթափանց ջրի համար: Ծածկույթը լավ կպչունություն ունի ցանկացած նյութի հետ (ներառյալ սալիկները), այն կարող է օգտագործվել պատերին և հատակին դիմացկուն ներկ ստանալու համար: Էմալը չի վախենում բորբոսից, երկար ժամանակ պահպանում է իր սկզբնական տեսքը և անվտանգ է առողջության համար։ Էպոքսիդային ներկը խոհանոցային սալիկների ներկման համար յուղաներկերի արժանի այլընտրանքն է, քանի որ էմալը արագ չորանում է և տալիս է գերազանց արդյունք:

Ներկերի Հիմնական Տեսակների Առավել Մանրամասն Նկարագրություն

Նախորդ ենթաբաժինը Ձեզ կօգնի ճիշտ տեսակի ներկ ընտրել՝ կախված յան հանգամանքից, թե կոնկրետ ինչ եք ուզում ներկել։ Իսկ եթե ներկերի կառուցվածքի ու հատկությունների մասին առավել մանրամասն տեղեկատվություն եք փնտրում, կգտնեք այն ստորև։ 

Այստեղ ներկայացված են ամենատարածված ներկերի մասին մի փոքր ավելի մանրամասն նկարագրություններ։

Յուղաներկեր

Ներկի անունն ինքնին խոսում է դրա բաղադրության մասին: Այս կամ այն չափով նրա մեջ առկա են բուսական յուղային խառնուրդներ կամ ներկաձեթ (օլիֆ):

Յուղաներկերը, որպես հարդարման նյութ, լայն տարածում են ունեցել  դեռևս շատ վաղուց։ Նրանք ունեն բազմազան գունային երանգների լայն տեսականի: Յուղաներկը համարվում է գնային տեսանկյունից ամենամատչելի տարբերակներից մեկը: Այս ներկերը չեն վախենում ջերմաստիչանի տատանումներից, խոնավությունից և  ունեն երկար ծառայության ժամկետ: Այս ներկը նախատեսված է մետաղի, փայտի, բետոնի և գիպսի ներկման համար։
Յուղաներկը կարելի է օգտագործել դրսի ու ներսի՝ նույնիսկ անմշակ պատերի ներկման համար, ունի հաճախակի լվանալու հնարավորություն, ինչպես նաև հուսալիորեն պաշտպանում է ներկված մակերեսը։ Այս ներկի լիարժեք չորացման համար պահանջվում է 24 ժամ։ Չնայած ակնհայտ առավելություններին յուղաներկերն ունեն նաև թերություններ: Դրանցից են տհաճ հոտի առկայությունը, այն, որ ներկը թույլ չի տալիս պատի մակերևույթին շնչել և ժամանակի ընթացքում օլիֆը դուրս է գալիս արտաքին շերտ՝ դեղնացնելով այն։                                                          

Նիտրո Ներկեր

Նիտրո ներկերը  նիտրոցելյուլոզային խեժերի վրա հիմնված էմալային ներկի և լաքի խառնուրդ են: Որպես կանոն, դրանք վաճառվում են պատրաստի տարաների մեջ կամ տեղական վերանորոգման համար նախատեսված աէորոզոլային բալոններով ։ 

Այս ներկերը հայտնի են նաև նիտրոէմալ անվանումով։ Սա այն եզակի ներկերից է, որի չորացման համար երկար ժամանակ չի պահանջվում, ինչը բացառում է ներկված մակերեսին մանր մասնիկների և փոշու կպնելու հավանականությունը: Նիտրո ներկերով պատված մակերեսները պատրաստ են շահագործման ընդամենը 30 րոպե հետո, իսկ լիարժեք չորացման համար անհրաժեշտ կլինի 2-3 ժամ։
Նիտրո ներկերի շնորհիվ հարդարման աշխատանքները լինում են առավել արդյունավետ։ Առանձնանում են նաև էսթետիկ տեսանկյունից՝ նույնիսկ մեկ շերտով պատելուց հետո մակերեսը լինում է փայլուն և հայելային հարթ։
Նիտրո ներկերը նախատեսված են ինչպես ներսի, այնպես էլ դրսի հարդարման համար։ Օգտագործվում են նաև բետոն, փայտ և մետաղ ներկելու համար։ Ունեն մատչելի գին: Այնուամենայնիվ, թվարկված առավելությունների հետ մեկտեղ նիտրո ներկերն ունեն նաև լուրջ թերություններ։ 

• Ունեն թունավորության բարձր մակարդակ, որը նրանց դարձնում է ամբողջովին ոչ էկոլոգիական։ Ցանկալի է անձնական պաշտպանիչ միջոցների օգտագործում ներկման աշխատանքներ կատարելիս: Ամեն դեպքում, բացօթյա աշխատանքի համար ավելի լավ է օգտագործել նիտրո էմալը կամ շատ լավ օդափոխել աշխատանքային տարածքը։
• Ունեն  գունաթափման և հրդեհման նկատմամբ հակում։
• Անհամատեղելի են շատ տեսակի ներկանյութերի հետ, որոնք արդեն առկա են աշխատանքային մակերեսի վրա՝ յուղ, լատեքս և ալկիդային ներկեր: Նիտրո էմալը նման ծածկույթի վրա քսելը, ամենայն հավանականությամբ, կհանգեցնի դրա ուռչմանը: 
• Հրդեհային դիմադրության ցածր գործակից ունեն և, որպես հետևանք, հրդեհային վտանգի բարձր մակարդակ:

Ջրաէմուլսիոն Ներկեր (Էմուլսիոն)

Էմուլսիոն ներկերը նոսրացվում են ջրով։ Դրանց կապող հիմքը և ներկող մասնիկները բաշխվում են ջրային միջավայրում՝ կազմելով կայուն էմուլսիա։ Չորանալուց հետո դրանք ջրով չեն մաքրվում, բայց դրանց հեշտ է լվանալ ձեռքերից և գործիքներից (մինչև նյութի չորանալը): 

Այս տեսակի ներկով լավ ներկվում է գրեթե ցանկացած մակերես: Էմուլսիոն ներկերը չեն կարող կիրառվել նախկինում փայլուն ներկերով կամ կպչուն ներկերով ներկված մակերեսների վրա: Նույնը վերաբերում է լաքապատ մակերեսներին: Դրան հակառակ՝ էմուլսիոն ներկերից հետո կարող եք օգտագործվել ցանկացած ներկ և էմալ: Էմուլսիոն ներկերը արագ չորանում են։ 

Վերանորոգման աշխատանքներում շատ կարևոր է էկոլոգիապես անվտանգ նյութերի օգտագործումը, դրանց երկարակյացությունը, օգտագործման պարզությունը և այլն։ Այդ իսկ պատճառով բարձրորակ յուղաներկերին զուգահեռ ժամանակի ընթացքում լայն կիրառություն են ստացել նաև ջրաէմուլսիոն ներկերը։ Էմուլսիոն ներկերն առանձնանում են իրենց էկոլոգիականությամբ, հրդեհակայունությամբ։ Հարմար են ցանկացած մակերեսի համար (բետոնե, փայտե և այլն)։
Էմուլսիոն ներկերը զերծ են սուր քիմիական հոտերից, իսկ ներկելուց հետո հոտը երկար չի պահպանվում։ Բարձրորակ ներկերի շնորհիվ վերանորոգումը կլինի ոչ միայն գեղեցիկ, այլև կծառայի շատ երկար։ Էմուլսիոն ներկերը հաճախ անվանում են ավելի կայուն և որակյալ, քան լատեքսային ներկերը, բայց դրանք նաև ավելի բարձր գին ունեն: Իրականում, երկու ներկերի բնութագրերը մոտավորապես նույնն են։ Հիմնական տարբերությունը գույնի և գնի մեջ է:

Լատեքսային Ներկեր

Պետք է նշել, որ լատեքսը ռետինե բույսերի հյութից ստացված բնական նյութ է: Եվ սա անմիջապես ապահովում է ոչ թունավորություն և անվտանգություն լատեքսային ներկի համար: Իհարկե, կա նաև արհեստական ​​լատեքս, որոնք պոլիմերներ են (որպես կանոն, ստիրոլ-բութադիենը գործում է որպես պոլիմեր) ՝ սոսնձող հատկություններով: 

Ընդհանրապես, լատեքսը նյութ չէ, այլ նյութի կամ նյութերի խառնուրդի հատուկ վիճակ: Այս վիճակը կոչվում է ջրի ցրում, որի դեպքում նյութի մասնիկները ջրի մեջ կախված են մակերեսին լավագույնս կպչելու համար: Լատեքսային ներկը կեղտադիմացկուն է և փոշի չի կուտակում: Այն թույլ է տալիս օդին իր միջով անցնել, «շնչել», ինչը հատկապես կարևոր է, եթե բնակիչները տառապում են թոքերի հիվանդություններով, օրինակ՝ ասթմայով, կամ եթե նրանք ունեն փոքր երեխաներ, կամ ընտանիքի անդամները տառապում են ալերգիայով։ 

Նյութի այս հատկությունը դրականորեն ազդում է ծածկույթի արտաքին տեսքի վրա, քանի որ այս դեպքում թթվածնի պղպջակներ չեն ձևավորվում մակերեսի վրա: Ի դեպ, ներկն ունի առաձգականության բարձր աստիճան, ինչը թույլ է տալիս այն քսել ոչ շատ հարթ ռելիեֆով մակերեսների վրա։ Այն արագ չորանում է, ինչը կարևոր է սահմանափակ ժամանակի պայմաններում (երկրորդ շերտը կարող է կիրառվել մի քանի ժամ հետո) և հեշտ է մաքրվում, ներառյալ թաց մաքրման եղանակով: 

Հետևաբար, նույնիսկ ամենահամառ կեղտը հեռացնելը սովորաբար առանձնապես դժվարություն չի ներկայացնում: Լատեքսային ներկերն իրենց հսկայական բազմազանությամբ, անշուշտ, պատրաստ են Ձեզ տրամադրել գեղեցիկ դիզայն: Թերևս հենց այս բազմազանությունն է, որ տարբերում է լատեքսային ներկը մյուս ներկերից: Գոյութուն ունեն առանց փայլի և բավականին նկատելի փայլով լատեքսային ներկեր: 

Ալկիդային Ներկեր

Ալկիդային ներկը ունիվերսալ ներկի ծածկույթ է, որը հիմնված է օրգանական լուծիչի վրա: Նման ներկերի բաղադրությունը ներառում է ալկիդ լաք (գլիֆթալիկ կամ պենտաֆտալիկ – սա ավելի հաճախ է օգտագործվում), բազմաթիվ լցոնիչներ (յուղեր, ավազ, մարմարի կամ գրանիտաի փշուրներ), լուծիչներ (սպիտակ սպիրտ (уайт-спирит)կամ տորպենտին(скипидар)) և գունանյութեր, հետևաբար ունենում են գույների լայն տեսականի։ 

Հարմար է փայտյա և մետաղական, ինչպես նաև սվաղված մակերեսներ ներկելու համար։ Չոր վիճակում դրանք ոչ թունավոր են, լույսի և ջրի նկատմամբ դիմացկուն են:   Ներկի բաղադրությունը կախված է այն ծածկույթներից, որոնց համար նախատեսված են: Եթե ​​դրանք փայտե ծածկույթների համար  են, ապա բաղադրության մեջ պարունակում է հակասեպտիկներ, եթե մետաղական մակերեսների համար են, ապա հակակոռոզիոն բաղադրիչների առկայությունը պարտադիր է:               

Ակրիլային Ներկեր

Ակրիլային ներկերի հիմքը ակրիլային խեժն է, որը չորանալուց հետո մակերեսի վրա ձևավորում է կոշտ թաղանթ։ Այս տեսակի ներկերը շատ հարմար են օգտագործման համար, և դրանք կարող են օգտագործվել գրեթե ցանկացած մակերես ներկելու համար: 

Նման ներկերը շատ արագ չորանում են, ուստի հաջորդ շերտը կարելի է քսել նախորդից մոտավորապես երկու ժամ հետո։ Շնորհիվ այն բանի, որ դրանք ջրում լուծվող են, դրանք կարող են հեշտությամբ նոսրանալ ջրով, և դա ոչ մի կերպ չի ազդի ներկված մակերեսի հատկությունների վրա: 

Բացի այդ, ներկելու համար օգտագործվող բոլոր գործիքները բավականին հեշտ են մաքրվում սովորական ջրով։ Ակրիլային ներկերը կարող են լինել անփայլ, փայլուն կամ կիսափայլ: Դրանք օգտագործվում են ինչպես արտաքին, այնպես էլ ներքին աշխատանքների համար։ Այն լավ է «նստում» նախորդ գույնի վրա և օգնում է թաքցնել մակերեսի աննշան թերություններն ու անհարթությունները: Այս ներկերը չեն գունաթափվում, քանի որ դիմացկուն են ուլտրամանուշակագույն ճառագայթների նկատմամբ:

Ֆասադային Ներկեր

Ֆասադային ներկերը նախատեսված են բետոնե, պլաստմասսե, փայտե, աղյուսե, մետաղյա  մակերևույթների մակերեսները ներկելու համար: 

Բետոնի համար առաջարկվող ֆասադային ներկերը թաքցնում են ավելորդ ծակոտկենությունները, անհարթությունները և փոքր ճաքերը: Բայց, ի տարբերություն սվաղերի (որոնք կարող են նաև գունավորվել), նրանք չեն փակում որմնակարերը, այդ պատճառով այս ներկերը քսվում են նախապես պատրաստված մակերեսների վրա: 

Ֆասադային ներկերը նախատեսված են ոչ միայն շենքը զարդարելու, այլև արտաքին գործոններից ճակատը պաշտպանելու համար: Պատերը ենթարկվում են արևի լույսի, տեղումների, ջերմաստիճանի տատանումների, ինչպես նաև կա վտանգ բորբոսի կամ սնկերի առաջացման: 

Ահա թե ինչու փորձագետները խորհուրդ են տալիս ընտրել բացառապես բարձրորակ արտադրանք` շինության ճակատը ներկելու համար: Ներկ ընտրելիս անպայման ուշադրություն պետք է դարձնել բաղադրության մեջ միացնող նյութերի պարունակությանը: 

Ֆասադային  ներկերը պարունակում են սինթետիկ խեժեր, բայց նաև կարող են պարունակել կրաքար, ցեմենտ, հեղուկ ապակի: 

Այն, թե ինչքան լավ այս տեսակի ներկը կծառայի, մեծապես կախված է ներկող մասնագետից: Մի փոքր մատչելի տարբերակները առանձնանում են կպչողունակությունը բարձրացնող նյութերի փոքր քանակով։ Հետևաբար, դրանք հաճախ փոխարինվում են լցոնիչներով, որոնք մեծացնում են ներկի ծավալը, սակայն որակը վատանում է դրանից: 

Ներկի ընտրության առանձնահատկությունները կախված են հիմքի բնույթից: Սվաղ, սիլիկատ, կրաքար, աղյուս, բետոն. այս ներկվող մակերեսներից յուրաքանչյուրը պահանջում է տարբեր ներկեր: 

Ջրակայուն Ֆասադային ներկերն օգտագործվում են պատերը խոնավությունից պաշտպանելու համար, այդ իսկ պատճառով արտադրանքը պետք է ունենա ցածր ջուր ներծծող հատկություն: Հակառակ դեպքում, ճակատը կթացանա և կկեղտոտվի: Նաև խոնավության բարձր մակարդակի պատճառով պատերին աղեր են նստում, առաջանում են ճաքեր։ Որքան ցածր է ֆասադաին ջրի թափանցելիության մակարդակը, այնքան լավն է ներկը:  

Ֆասադային Ներկերի Հիմնական Տեսակներ         

Եթե որոշել եք Ձեր բնակարանի, շենքի, կամ այլ շինության արտաքին տեսքը փոփոխել՝ ներկերի միջոցով, ահա մի քանի ֆասադային ներկի տեսակ, որոնք կարող եք հաշվի առնել։                       

Ակրիլային Ֆասադային Ներկեր        

Ակրիլային ֆասադային ներկերը բաղկացած են ակրիլային խեժերի, գունանյութերի, լցանյութերի, հավելումների և նոսրացնող նյութերի խառնուրդից: Ակրիլային խեժն ապահովում է մակերեսի գերազանց կպչունություն և եղանակային պայմաններին  դիմադրողականությունը, իսկ պիգմենտները ապահովում են հարուստ գույներ: Լցանյութերը և  հավելումները ապահովում են ներկի անհրաժեշտ  հատկությունները: 

Ջուրը կամ օրգանական լուծիչը օգտագործվում են  մածուցիկությունը կարգավորելու համար։ Ֆասադի հարդարման համար օգտագործվում են ջրային հիմքով ներկեր, քանի որ դրանք հարմար են և հեշտ օգտագործման համար:

Առավելություններ

• Բարձր առաձգականություն. Ակրիլային ներկերն ունեն առաձգականության բարձր աստիճան, ինչը թույլ է տալիս նրանց հետևել մակերևույթի շարժմանը և սեզոնային ընդարձակման և կծկման ժամանակ չճաքել կամ չպոկվել:
• Օգտագործման  լայն հնարավորություն. Կարող են օգտագործվել ինչպես ներքին, այնպես էլ արտաքին հարդարման համար:
• Լուծիչների ցածր պարունակություն. Պարունակում են ավելի քիչ լուծիչներ՝ դարձնելով դրանց էկոլոգիապես ավելի մաքուր:
• Ուլտրամանուշակագույն ճառագայթման նկատմամբ դիմադրողականություն. ներկը երկար ժամանակ չի գունաթափվում:

Թերություններ

• Ցածր գոլորշու թափանցելիություն,        
• Բարձր գին,                                                                        
• Ցանկալի գույնը ստացվում է երանգավորմամբ,
• Բետոնի մակերևույթները ներկ քսելուց առաջ պահանջում են լրացուցիչ նախաներկում, որպեսզի մեծացնեն ներկի կպչունությունը հիմքին:

Սիլիկոնային Ֆասադային Ներկեր              

Սիլիկոնային ներկերը բաղկացած են սիլիկոնային խեժից, գունանյութերից, լցոնիչներից,  հավելումներից և լուծիչներից: Նրանք ունեն բարձր ամրություն, առաձգականություն, մաշվածության նկատմամբ դիմադրողականություն և պաշտպանում են ներկած մակերեսը մթնոլորտային պայմանների ազդեցությունից:

Առավելություններ

• Գոլորշու բարձր թափանցելիություն. Սա թույլ է տալիս խոնավությունը հեռացնել ջերմամեկուսիչ շերտից:
• Բարձր դիմադրություն՝ ջրի, ուլտրամանուշակագույն ճառագայթների, թթուների և ալկալային լուծույթների նկատմամբ՝ մակերեսի վրա բարակ սիլիկոնային շերտի ձևավորման շնորհիվ:
• Էլաստիկություն. Ունեն առաձգականության բարձր աստիճան, ինչը թույլ է տալիս դիմակայել մեծ դեֆորմացիաներին՝ չկորցնելով իրենց հատկությունները։
• Ոչ թունավոր. Էկոլոգիապես մաքուր են և չեն պարունակում մարդու առողջության և շրջակա միջավայրի համար վտանգավոր նյութեր: Այս ներկերը նաև չունեն սուր հոտ։
• Արտաքին գրավիչ տեսք. Այս ներկերի առաձգականությունը դարձնում է դրանք արտաքինից ավելի հարթ, քան շատ այլ տեսակի ներկեր:
• Երկար ծառայության ժամկետ. Սիլիկոնե ֆասադային ներկերն ունեն երկար սպասարկման ժամկետ և երկար տարիներ չեն պահանջում վերաներկում: Դրանք լավ են դիմադրում սնկերին և բորբոսին և ժամանակի ընթացքում չեն մաշվում։

Թերություններ

• Բարձր արժեքը. Սիլիկոնե ֆասադային ներկերն ավելի թանկ են, քան շատ այլ տեսակի ներկեր:
• Սիլիկոնե ներկերը արտադրվում են սպիտակ գույնով: Ձեր կողմից այլ ցանկալի գույնը ստացվում է երանգավորմամբ։

Սիլիկատային Ֆասադային Ներկեր

Այս ներկերի շնորհիվ տան արտաքին պատին ձևոավորվում է դիմացկուն ծածկույթ, որն ունի գոլորշու թափանցելիության բարձր մակարդակ և լավ սոսնձման ունակություն։ Այս հատկությունը սիլիկատային ֆասադային ներկը դարձնում է իդեալական ընտրություն տարբեր մակերեսների վրա օգտագործելու համար, ինչպիսիք են աղյուսը, բետոնը և բնական քարը, սալաքարը, կերամիկան, ապակին: 

Սիլիկատային ներկերը երկար ժամանակ պահպանում են իրենց պայծառությունն ու գույնը, իսկ իրենց օգտակար հատկությունների շնորհիվ հաճախակի մշակում չեն պահանջում։

Առավելություններ

• Երկարակեցություն. Սիլիկատային ներկերը շատ դիմացկուն են և կարող են պահպանել իրենց սկզբնական տեսքը մի քանի տասնամյակ։ 
• Դիմացկունություն. Դիմացկուն են ջերմաստիճանի հանկարծակի փոփոխություններին։
• Ունեն նաև բարձր կայունություն քիմիական ազդեցությունների նկատմամբ և համեմատաբար առավել մատչելի են ֆասադային ներկերի տարբերակների մեջ։ 

Թերություններ

• Թունավոր հատկություններ. Այս ներկերն օգտագործելիս պահանջվում է օգտագործել պաշտպանիչ հագուստ և միջոցներ, քանի որ դրանց հետ ուղիղ երկարաժամկետ առնչվելը կարող է թունավորում առաջացնել մարդու մոտ։ 
• Ոչ առաձգական ներկ. Ներկն օգտագործելուց առաջ հիմքի մակերեսը պետք է լինի հարթ` առանց թերությունների և ճաքերի, քանի որ ոչ առաձգական ներկը չի կարողանա թաքցնել դրանք:

Այլ Ֆասադային Ներկեր

Ստորև ներկայացվող ֆասադային ներկերի գրեթե բոլոր տեսակները կամ ջրում լուծվող են, կամ ստացվում են օրգանական լուծիչներով: 

Բացի դրանցից, շուկայում առկա են նաև հանքային ներկեր, որոնք հիմնված են կրի և ցեմենտի վրա և էկոլոգիապես մաքուր են: 

Ըստ անդրադարձման հատկությունների՝ լինում են անփայլ, փայլուն և կիսափայլ ներկեր: 

Ջրի մեջ լուծվող ֆասադային ներկերը լինում են՝

• լատեքսային (հիմնական բաղադրիչը ակրիլային խեժն է),
• սիլիկոնային (նույնպես խեժերով, բայց արդեն սիլիկոնով),
• սիլիկատային (սրանց հիմքը «հեղուկ ապակին» է)։

Առհասարակ, ջրաէմուլսիոն ֆասադային ներկը դարձել է դե ֆակտո ստանդարտ, քանի որ դրա բաղադրությունը դիմացկուն է արևի լույսին և ուլտրամանուշակագույն ճառագայթմանը: Ֆասադները ներկելու համար օգտագործվող ներկերի բաղադրության համար շատ կարևոր հատկություն է նաև դիմադրությունը եղանակային պայմաններին:

Շենքերի պլաստմասե մակերեսները նույնպես կարելի է  ներկել ֆասադային ներկերով: Պետք է, իհարկե, հաշվի առնել, որ  վերանորոգման այս տարբերակը ավելի հարմար է տնտեսական շինությունների և առևտրային օբյեկտների համար, քան բնակելի տարածքների համար: Այս ներկերը  պարունակում են հակաստատիկ հավելումներ, որոնց շնորհիվ երեսպատումն այլևս չի ձգում փողոցի փոշին։

Եզրակացութուն

Բարձր խոնավությամբ սենյակների համար՝ հատկապես խոհանոցների և լոգարանների համար, հարմար է ակրիլային ներկը, որը պարունակում է միայն ակրիլային մանրաթելեր կամ լատեքս, ինչպես նաև ակրիլ-լատեքս: 

Բնակելի սենյակների (հատկապես մանկական և ննջասենյակների) կամ սենյակների համար, որտեղ հաճախ հանդիպում են ալերգիա կրողներ և թոքերի հիվանդություններով տառապող մարդիկ, հարմար է էկոլոգիապես մաքուր լատեքսային ներկը: 

Եթե ​​Ձեր ննջասենյակի կլիման խոնավ չէ, կարող եք ձեռք բերել ջրի վրա հիմնված էմուլսիա. ակրիլ՝ վինիլով խառնված: 

Վերջում՝ եթե հետաքրքրված եք շենքն արտաքինից ներկելով, ջրաէմուլսիոն ներկն այս ոլորտի ամենաստանդարտ ընտրություններից է։