Ըստ միջազգային վիճակագրության՝ մարդն իր կյանքի մոտավորապես 5 տարին անցկացնում է լոգասենյակում։ Ուստի, այս սենյակը պետք է լինի հնարավորինս գեղեցիկ ու հարմարավետ։
Լողասենյակի կարևոր բաղադրիչներից մեկը զուգարանակոնքն է: Նախ և առաջ այն պետք է լինի հարմարավետ, ապա համադրվի մյուս բաղադրիչների հետ համահունչ արտաքին տեսք ստեղծելու համար:
Ինչպե՞ս ընտրել լոգասենյակի ամենակարևոր մասը կազմող սանտեխնիկան՝ զուգարանակոնքը, և ի՞նչ չափանիշներով առաջնորդվել։
Առաջարկում ենք ծանոթանալ զուգարանակոնքերի հիմնական տեսակներին ու դրանց օգտագործման առավելություններին ու թերություններին ճիշտ ընտրություն կատարելու համար:
Դասական Զուգարանակոնքեր
Սրանք ամենատարածված զուգարանակոնքերն են: Բաղկացած են երկու մասից՝ նստատեղից և ջրի բակից: Լինում են հիմնականում կերամիկական, և ջրի բակի վրա ամրացված է ջուրը քաշելու սեղմակ: Այսպիսի զուգարանակոնքերի հազարավոր տեսակներ կան՝ տարբեր չափսերի, գույների ու ձևերի:
Համարվում է, որ այս տեսակները համեմատաբար մատչելին են, հեշտ են տեղադրման հարցում, ունեն ձևերի լայն ընտրություն:
Զուգարանակոնքն ամրացվում է հատակին պտուտակների միջոցով, իսկ տեղադրումը մեծ ջանքեր չի պահանջում։ Միակ թերությունն այն է, որ, ի տարբերություն կախովի զուգարանակոնքերի, այս տեսակն ավելի մեծ տարածք է զբաղեցնում։ Սակայն գոյություն ունեն նաև անկյունային մոդելներ, որոնք հիանալիորեն համադրվում են ցանկացած ինտերիերի հետ։
Զուգարանակոնքեր՝ Ջրի Բակը Պատի Մեջ
Այս տարբերակը զուգարանակոնքերի ջրի բակն անտեսանելի է դարձնում։ Վերջինս տեղադրվում է պատի մեջ, դառնում է անտեսանելի ու միայն ջուրը քաշելու սեղմակն է պատի վրա երևում:
Այս տարբերակը համարվում է նորաոճ ու մինիմալիստական, ստեղծում է առավել ընդարձակ ազատ տարածության զգացում:
Ջրի խնդիր առաջանալու ռիսկի ապահովագրման համար հիմնականում պատի մեջ ամրացված է լինում մուտք, որն անտեսանելի է, բայց հասանելի համապատասխան մասնագետի համար: Այսինքն՝ խնդիր առաջանալու դեպքում, մասնագետը կարող է այն լուծել առանց պատը քանդելու անհրաժեշտության։
Այն, որ ջրահեռացման բաքը տեղակայված է միջպատային տարածությունում, որը մշակվում է ձայնամեկուսիչ նյութերով, զգալիորեն կրճատվում է ջրի բացթողնման և բաքի լցոնման աղմուկը: Այս հանգամանքը ևս գրավիչ է դարձնում տվյալ զուգարանակոնքի տեսակը։
Պատից Կախված Զուգարանակոնքեր
Կախովի զուգարանակոնքերը կախված են պատից և չունեն ոտք: Բացի այդ՝ չկա նաև ջրի երևացող բակ: Այն կամ պատի մեջ է, ինչպես վերևի տարբերակում, կամ էլ լողասենյակի հատուկ կահույքի մեջ: Պատի վրա ամրացվում է ջուրը քաշելու սեղմակը:
Կարևոր է, որ պատը շատ ամուր լինի, որ կարողանա պահել զուգարանակոնքը, ինչպես նաև ջրի բակը: Պատից կախված զուգարանակոնքերը կարող են պահել մինչև 200 կգ ծանրություն:
Այսպիսի զուգարանակոնք տեղադրելը նորաոճ դիզայն է հաղորդում ձեր լողասենյակին: Չկա ջրի երևացող տարրա, երևում է միայն հատակից կտրված զուգարանակոնքը, որի շուրջբոլորը մաքրելը անհամեմատ ավելի հեշտ է՝ համեմատած ոտքով տարբերակների:
Պետք է նաև նշել, որ կախովի մոդելներն առավել թեթև են, քան բակով կոմպակտ զուգարանակոնքերը:
Ջրի Նեղ Բակով Զուգարանակոնքեր
Այսպիսի մոդելները նույնպես կազմված են 2 մասից․ ուղիղ, առանց խոր կորությունների նստատեղ և ջրի նեղ բակ: Ներքևի հատվածում այն շատ լավ փակում է հնարավոր երևացող բոլոր խողովակները կամ զուգարանակոնքի հետ առնչվող այլ դետալներ:
Շատ հեշտ է մաքրելու համար, քանի որ թաքնված ու կոր հատվածներ չկան, որտեղ կարող է ժամանակի ընթացքում կեղտ հավաքվել: Այս մոդելները նույնպես լավ ընտրություն են տարածքը վիզուալ ավելի մեծ դարձնելու համար։
Բարձր Զուգարանակոնքեր
Այս զուգարանակոնքերը սովորականներից ավելի բարձր են մոտ 4-5 սմ: Ըստ նախագծողների՝ այս տարբերակներն ունեն լրացուցիչ հարմարավետություն: Իրականում 5 սմ բարձրությունը կարող է մեծ տարբերություն չստեղծել շատերի համար, բայց բարձրահասակ մարդկանց համար նման բարձրությունը բավականին հարմար է:
Բացի այդ, նստելու ու վեր կենալու համար բարձր նստատեղով զուգարանակոնքերը ևս մեկ առավելություն ունեն. ավելի քիչ ճնշում է գործադրվում ծնկների վրա:
Առանց Նստատեղի Զուգարաններ (писуар)
Առանց նստատեղի զուգարանները (писуар) սանտեխնիկայի տեսակ են, որոնք նախատեսված են միայն միզելու համար: Այս սարքավորումները հաճախ տեղադրվում են հանրային զուգարաններում, ավելի հազվադեպ՝ մասնավոր տների և բնակարանների մեծ զուգարաններում։
Ի տարբերություն զուգարանակոնքի, սրանք սանհանգույցի լրացուցիչ և ոչ պարտադիր մաս են։ Նման զուգարանի պարամետրերը կախված են սենյակում ազատ տարածության առկայությունից և օգտագործողների պահանջներից:
Այս սարքավորման վերին մասում տեղադրվում է ջրամատակարարման խողովակ և ջրահեռացման համակարգ, իսկ ստորին մասում առկա է անցք, որը միացվում է կոյուղուն։
Այս մոդելները սովորաբար ունեն բարձր արժեք և բարդ տեղադրում: Տեղադրման տարածքը նախապես ամրացվում է ամրաններով: Այս տիպի զուգարանակոնքերում օգտագործվում են 3 տիպի ջրահեռացման համակարգ՝ ձեռքով կառավարվող, կիսաավտոմատ և ավտոմատ:
Առանց Նստատեղի Զուգարաններ (чаша генуя)
Առանց նստատեղի զուգարանները կամ հատակի ունիտազները հայտնի են որպես թուրքական զուգարաններ: Սրանք օգտագործվում են հասարակական զուգարաններում, զինվորական զորանոցներում, բանտերում, հանդիպում են դպրոցներում, հիվանդանոցներում, հանրակացարաններում և այլ հասարակական վայրերում:
Այս զուգարանների առավելություններից են մատչելի գինը, կոնստրուկցիայի պարզությունն ու հուսալիությունը, որը թույլ է տալիս հասարակական զուգարանին աշխատել տարբեր ֆիզիկական և տեխնիկական վնասների առաջացման պայմաններում (սովորական զուգարանը հեշտությամբ կարող է կոտրվել)։ Ինչպես նաև առավելություն է հիգիենան։ Այն օգտագործելիս զուգարանի այցելուն դիպչում է զուգարանին միայն իր կոշիկների ներբաններով:
Հիմնական թերությունը կծկվելու անհրաժեշտության մեջ է, որը պահանջում է զգուշություն և հավասարակշռության պահպանում:
Ներկայումս զուգարանների արտադրության համար ամենատարածված նյութերն են թուջը, կերամիկան և պողպատը: Այնուամենայնիվ, չնայած տարբեր տեսակի թուրքական զուգարաններին, դրանք բոլորն էլ ըստ էության անցք են հատակին:
Դրսի Զուգարաններ
Սա հիմնականում գյուղական տնակներում հանդիպող փոքրիկ «տնակ է», որի տակ անցք կա: Այն կառուցելու համար սովորաբար փոս են փորում, իսկ այնուհետև զուգարանն է դրվում դրա վերևում։
Զուգարանի պատրաստման համար օգտագործվում է փայտանյութ կամ պեմզաբլոկ: Ստորգետնյա ջրերի առկայության պարագայում փոսը պետք է գտնվի դրանցից բարձր մակարդակի վրա:
Քանի որ անընդունելի է թափոնների մուտքը հանրային օգտագործման համար նախատեսված ջրային աղբյուրներ, երբ նման զուգարանի տակ գտնվող փոսը լցվում է, այն մաքրվում է։ Դրա համար գոյություն ունի հատուկ սարքավորված (կեղտաջրերի) մեքենա:
Մանկական Զուգարանակոնքեր
Առանձնացվում են նաև մանկական զուգարանակոնքերը։ Դրանք տեղադրվում են ինչպես նախադպրոցական հաստատություններում, այնպես էլ բնակարաններում: Երեխաների համար նախատեսված զուգարանակոնքերի ստանդարտ չափսերը հետևյալն են՝
- երկարությունը պետք է լինի 28-40սմ-ի սահմաններում,
- լայնությունը` 21-29 սմ,
- բարձրությունը`13-33 սմ։
Այս չափանիշներն, իհարկե, կախված են նաև երեխայի տարիքից և կազմվածքի առանձնահատկություններից։
Չպետք է մոռանալ, որ երեխաներն արագ են մեծանում, ուստի անհրաժեշտ է նախապես ընտրել 20-25% ավել չափսով սարքավորում:
Խորհուրդ է տրվում տեղադրել մանկական զուգարանակոնքը միայն այն դեպքում, երբ սանհանգույցում կա բավարար ազատ տարածություն։ Հակառակ դեպքում անհրաժեշտ է զուգարանակոնքի վրա տեղադրել հատուկ հարմարանք, որի օգնությամբ երեխային հարմար կլինի օգտվել սանտեխնիկայից:
Այժմ նույնիսկ մշակված են աստիճանով վրադիր հարմարանքներ, որոնք օգնում են երեխային բարձրանալ զուգարանակոնքի վրա նույնիսկ առանց ծնողի օգնության:
Զուգարանակոնքերի Տեսակներն Ըստ Կոյուղու Համակարգի Հետ Միացման
Ըստ դեպի կոյուղի արտահոսքի տեսակի՝ զուգարանակոնքերը լինում են ուղղահայաց, հորիզոնական և թեք։ Պահանջվող դիզայնի ընտրությունը ուղղակիորեն կախված է կոյուղու մուտքի գտնվելու վայրից:
Թեք Արտահոսքով Զուգարանակոնքեր
Թեք արտահոսքով զուգարանակոնքերը տարածված են եղել հատկապես անցյալ դարի 70-80-ական թվականներին՝ բազմաբնակարան շենքերի կոյուղու համակարգերի տեղադրման ժամանակ: Սակայն այս տեսակի զուգարանակոնքերը լայն տարածում են գտել նաև վերջին տասնամյակների ընթացքում, երբ կոյուղագծերի մոնտաժումն իրականացվում է առաստաղների հարթությունում:
Հորիզոնական Արտահոսքով Զուգարանակոնքեր
Այժմ ժամանակակից որոշ շինություններ նախագծվում են հորիզոնական արտահոսքով զուգարանակոնքերի օգտագործելու համար: Հորիզոնական և թեք արտահոսքով զուգարանակոնքերը տարբերվում են թեքության անկյունով, որը առաջին տարբերակի դեպքում գրեթե հավասար է 180°-ի (հատակին զուգահեռ), իսկ երկրորդի դեպքում՝ կոյուղու մուտքի նկատմամբ 140 - 145°։
Միևնույն ժամանակ, թեք արտահոսքով զուգարանակոնքերի միացման կետը չի կարող օգտագործվել հորիզոնական արտահոսքով զուգարանակոնքեր տեղադրելու համար՝ առանց հատուկ խողովակների օգտագործման:
Ուղղահայաց Արտահոսքով Զուգարանակոնքեր
Լայնորեն տարածում է գտել ուղղահայաց արտահոսքով զուգարանակոնքերի օգտագործումը: Այս մեթոդը թույլ է տալիս տեղադրել սանտեխնիկան սենյակի ցանկացած կետում և թաքցնել խողովակաշարերը՝ օգտագործելով հատակի և ներքևի հարկի առաստաղի միջև ընկած տարածքները:
Ի՞նչին Ուշադրություն Դարձնել Զուգարանակոնք Ընտրելիս
Զուգարանակոնքի ընտրության ժամանակ խորհուրդ է տրվում ուշադրություն դարձնել հետևյալ կետերին՝
- զուգարանակոնքի չափսերի համապատասխանությանը շինության չափսերին,
- գրավիչ արտաքին տեսքը՝ համապատասխանությունը ընդհանուր դիզայնին,
- օգտագործման հարմարավետությունը տան բոլոր անդամների համար,
- տեղադրման հեշտությունը։
Զուգարանակոնքի Չափսեր. Ի՞նչ է Պետք Հաշվի Առնել
- Տեղադրումից հետո զուգարանակոնքը պետք է չխանգարի սանհանգույցում նորմալ տեղաշարժմանը, պետք է չխոչընդոտի մուտքային դռան կամ պահարանների դռները բացելուն:
- Զուգարանակոնքի վրա հարմար տեղավորվելու համար դրա առջևում պետք է թողնել առնվազն 60 սմ ազատ տարածություն։ Եթե հեռավորությունը նշվածից փոքր լինի, ծնկները կհպվեն պատին կամ կահույքին: Իհարկե, այս ստանդարտ համարվող ցուցանիշը կախված է նաև զուգարանակոնքն օգտագործող մարդու հասակից:
- Ճիշտ է համարվում զուգարանակոնքի տեղադրման այնպիսի բարձրություն, երբ նստած դիրքում ոտքերը գտնվում են հատակին, այլ ոչ թե կախված են օդում։ Հակառակ դեպքում ոտքերն անընդհատ լարված կլինեն:
- Զուգարանակոնքի լայնությունն ընտրելիս նույնպես պետք է առաջնորդվել սանտեխնիկայից առավել հաճախ օգտվող մարդու կազմվածքից: Կարևորն այն է, որ նստելու ընթացքում մկաններում չառաջանա ցավի զգացողություն: Եզերքը շատ նեղ լինելու դեպքում կարող է տհաճ ճնշում գործադրվել ոտքերի վրա, իսկ եզերքը լայն լինելու դեպքում, ոտքերը կարող են արագ թմրել:
- Առողջության տեսակետից կարևթր է նաև, թե ինչ նյութից է պատրաստված զուգարանակոնքը: Լավ է գնել բարձրորակ պլաստիկից պատրաստված արտադրանք, որը նախապես մշակվել է հակաբակտերիալ միջոցներով։
- Խորհուրդ չի տրվում օգտագործել փայտից պատրաստված նստատեղեր։ Նախ՝ դրա վրա հնարավոր չէ քսել հակաբակտերիալ ծածկույթ: Միևնույն ժամանակ փայտի ծակոտկենության պատճառով նստատեղը կլանում է վնասակար գոլորշիներ և մանրէներ, որոնք կարող են հիվանդությունների առաջացման պատճառ դառնալ:
- Կարևոր է հատուկ ուշադրություն դարձնել նաև զուգարանի կափարիչին։ Եթե այն օգտագործման ընթացքում շեշտակի ընկնում ու հարվածում է նստատեղին և օղակին, զուգարանակոնքը կարող է արագ կոտրվել կամ վնասվել։ Կարևոր է նաև, որպեսզի այն ավելորդ աղմուկ չառաջացնի։
Լավ Զուգարանակոնքի Հիմնական Հատկանիշները
Ահա մի քանի լրացուցիչ դետալ, որոնց պետք է ուշադրություն դարձնել զուգարանակոնք ընտրելիս։
Ամրացման Տեսակը
Զուգարանակոնքի տեղադրումը կախված է սենյակի չափերից։ Եթե նեղ սենյակում տեղադրվի հատակի զուգարանակոնք, ապա տեղաշարժվելը բավականին դժվար կլինի, մինչդեռ կախովի տարբերակը թույլ կտա տարածքը խնայել։
Ջրահեռացման Բակը
Շատ կարևոր է նաև բակի, ջրթողության համակարգի տեսակը, քանի որ հենց դրանցով է պայմանավորված օգտագործման հարմարավետությունն ու ջրի սպառումը։ Ժամանակակից զուգարանակոնքերի մեծամասնությունն ունեն արտահոսքի 2 ռեժիմ՝ առավելագույն և կես ծավալով, ինչը թույլ է տալիս խնայել ջրի ծախսը:
Պատրաստման Նյութ
Ժամանակակից շուկան առաջարկում է զուգարանակոնքերի լայն տեսականի՝ պատրաստված տարբեր նյութերից (հախճապակի, ճենապակի, քար, մետաղ, և այլն):
Զուգարանակոնքի միջին պարամետրերը հետևյալն են՝
- հախճապակե արտադրատեսակներ` 26-31,5 կգ,
- ճենապակե զուգարանակոնքեր` 24.5-29 կգ,
- չժանգոտվող պողպատից սանտեխնիկա` 12-19 կգ
- մարմարե մոդելներ (համարվում են ամենածանրը)` 100-150 կգ,
- հատուկ պլաստիկից սանտեխնիկան (համարվում են ամենաթեթևը)`10.5 կգ:
