2025 թվականի մարտին Հայաստանի անշարժ գույքի շուկան նախորդ տարվա համեմատ շարունակել է դրսևորել անկման միտումներ:
Ընդհանուր գործարքների անկում 2025թ. մարտին
4.3% նվազում ամբողջ հանրապետությունում
2025թ. մարտին Հայաստանի Հանրապետությունում գրանցվել է ընդհանուր 19,345 գործարք (2024թ. մարտին 20,222 գործարքի համեմատ նվազել է 4.3%):
0.8% նվազում Երևան քաղաքում
2025 թ․ մարտին Երևան քաղաքում գրանցվել է ընդհանուր 5,380 գործարք (2024թ. մարտին 5,421 գործարքի համեմատ նվազել է 0.8%):
Հետաքրքրական է նկատել, որ գործարքների շուրջ 27.8%-ը կենտրոնացած է Երևանում, որին հաջորդում է Կոտայքի մարզը՝ 17.4% ցուցանիշով: Առհասարակ, գործարքների ավելի քան 63%-ը կատարվել է Երևանում և հարակից մարզերում (Կոտայք, Արարատ, Արմավիր), ինչը վկայում է մայրաքաղաքի և հարակից տարածքների անշարժ գույքի շուկայի գերակա դիրքի մասին:
Ընդհանուր գործարքների տեսակային բաշխվածությունը
Ընդհանուր գործարքների կառուցվածքում գերակշռում են օտարման գործարքները՝ 34.3%, որոնց հաջորդում են ժառանգության (17.5%), առաջնային գրանցման (17.3%) և գրավադրման (14.7%) գործարքները: Ըստ անշարժ գույքի տեսակների, գործարքների 41%-ը բաժին է ընկնում հողամասերին, 23.1%-ը՝ բնակարաններին, 21.3%-ը՝ բնակելի տներին:
Օտարման գործարքների նվազում 2025թ. մարտին
3.7% նվազում ամբողջ հանրապետությունում
2025թ. մարտին Հայաստանի Հանրապետությունում գրանցվել է ընդհանուր 6,643 օտարման գործարք (2024թ. մարտի 6,900 գործարքի համեմատ նվազել է 3.7%):
0.9% աճ Երևան քաղաքում
2025 թ․ մարտին Երևան քաղաքում գրանցվել է ընդհանուր 2,077 օտարման գործարք (2024թ. մարտի 2,059 գործարքի համեմատ աճել է 0.9%):
Առուվաճառքի գործարքների դինամիկան
6.1% նվազում ամբողջ հանրապետությունում
2025թ. մարտին գրանցվել է 4,258 առուվաճառքի գործարք, որը 2024թ. մարտի 4,537 գործարքի համեմատ նվազել է 6.1%-ով:
1.2% աճ Երևան քաղաքում
Երևանում առուվաճառքի գործարքների քանակը 2025թ. մարտին կազմել է 1,470, որը 2024թ. մարտի 1,453 գործարքի համեմատ աճել է 1.2%-ով:
Իրավաբանական անձանց մասնակցությունը շուկայում
2025 թ․ մարտին անշարժ գույքի 718 (ընդհանուր առուվաճառքի գործարքների 16,9%) առուվաճառքի գործարքներում իրավաբանական անձինք 560 գործարքում հանդես են եկել որպես վաճառողներ (78.0%), ընդ որում նրանց կողմից վաճառված գույքերի 64%-ը կազմել են բնակարանները, իսկ 24%-ը՝ ավտոտնակները: Սա վկայում է կառուցապատողների կողմից նոր կառուցված գույքերի վաճառքի մասին:
Օտարերկրյա քաղաքացիների մասնակցությունը
2025թ․ մարտին օտարերկրյա քաղաքացիների մասնակցությամբ 295 գործարքներում նույնպես գերակշռում են վաճառող դերում հանդես եկողները (57.3%): Օտարերկրացիները 2025թ․ մարտին հիմնականում վաճառում են բնակարաններ (38%) և հողեր (32.4%), իսկ գնում են հիմնականում բնակարաններ (48.4%): Առուվաճառքի գործարքներ իրականացրած օտարերկրյա քաղաքացիների քաղաքացիությունն ըստ երկրների բաշխված է հետևյալ կերպ․
Ռուսաստանի Դաշնություն - 227 գործարք
ԱՄՆ - 22 գործարք
Իրան - 6 գործարք
Սիրիա - 1 գործարք
Եվրոպական պետություններ - 26 գործարք
ԱՊՀ պետություններ (բացառությամբ ՌԴ) - 15 գործարք
Այլ պետություններ - 3 գործարք
Բնակարանների առուվաճառքում նորակառույցների մասնաբաժինը
2025 թ․ մարտին Հայաստանի Հանրապետությունում իրականացվել է բազմաբնակարան բնակելի շենքերի բնակարանների առուվաճառքի 1,309 գործարք։ Երևանում բնակարանների 952 գործարքից 451-ը ձեռք է բերվել կառուցապատողից։ Գործարքների 47%-ը կազմել են նորակառույցների (կառուցապատողից գնված) գործարքները, 53%-ը՝ երկրորդային շուկայում գործարքները: Սա վկայում է նորակառույց բնակարանների նկատմամբ դեռևս պահպանվող բարձր պահանջարկի մասին:
Հողերի շուկան 2025 թվականի մարտին
2025 թվականի մարտին իրականացվել է 1,789 հողերի առուվաճառքի գործարք (2024թ. Մարտի 1934 գործարքի համեմատ նվազել է 7.5%)։ Հողերի առուվաճառքի գործարքների հիմնական մասը կատարվել է մարզերում, որտեղ առաջատարը Կոտայքի մարզն է՝ 25.3% ցուցանիշով: Հետաքրքիր է, որ Երևանում հողերի առուվաճառքի գործարքները կազմում են ընդամենը 3.2%:
Վարձակալության շուկայի 14.1% կտրուկ անկում
2025թ. մարտին գրանցվել է 1,056 վարձակալության գործարք, որը 2024թ. մարտի 1,229 գործարքի համեմատ նվազել է 14.1%-ով: Վարձակալության գործարքների 59.8%-ը կատարվել է Երևանում: Վարձակալության գործարքների 62.8%-ը բաժին է ընկնում հասարակական նշանակության շինություններին, 25.4%-ը՝ հողերին:
Գրավադրման գործարքների աճ
2025թ. մարտին գրանցվել է 2,846 գրավադրման գործարք, որը 2024թ. մարտի 2,516 գործարքի համեմատ աճել է 13.1%-ով: Գրավադրման գործարքների 45.4%-ը կատարվել է Երևանում: Գրավադրման գործարքների 48.6%-ը բաժին է ընկնում բնակարաններին, 24.2%-ը՝ բնակելի տներին:
Հիփոթեքային գրավադրման գործարքների թիվը 2025թ. մարտին կազմել է 716, որը 2024թ. մարտի 567 գործարքի համեմատ աճել է 26.3%-ով: Հիփոթեքային գրավադրման գործարքների 62.2%-ը կատարվել է Երևանում, 73.6%-ը վերաբերում է բնակարաններին:
