Ռիելթորի մասնագիտական որակավորման քննություն

«Ռիելթորական գործունեության մասին» օրենքի 3-րդ, 16-րդ և 20-րդ հոդվածները գործում են 2026 թ. նոյեմբերի 1-ից։ Օրենքի մյուս դրույթներն ուժի մեջ են մտնում 2027 թ. հունիսի 1-ից։ Օրենքը ռիելթորի համար նախատեսում է ռիելթորի որակավորման գործող վկայական և հաշվառում Կադաստրի կոմիտեում։ Որակավորման վկայականը տրվում է հինգ տարի ժամկետով։ Օրենքի հոդվածներ 3, 8, 17, 22 ↗

Որակավորման քննությանը կարող են մասնակցել բարձրագույն կրթություն ունեցող ֆիզիկական անձինք։ Օրենքի 22-րդ հոդվածի 9–10-րդ մասերով նախատեսված անցումային կարգով՝ ՀՀ բարձրագույն ուսումնական հաստատության համապատասխան կրթական ծրագրին մասնակցած և մասնակցության հավաստագիր ստացած անձը կարող է դիմել ծրագրի մեկնարկից առավելագույնը երկու տարվա ընթացքում՝ առանց բարձրագույն կրթությունը հաստատող փաստաթղթի։

Այդ հիմքով ռիելթորի որակավորման վկայական ստանալուց հետո անձը պարտավոր է հինգ ուսումնական տարվա ընթացքում բարձրագույն կրթություն ստանալ և յուրաքանչյուր ուսումնական տարվա ավարտից հետո Կադաստրի կոմիտե ներկայացնել հաջորդ կուրս տեղափոխվելու մասին բուհի տեղեկանքը։ Օրենքի հոդվածներ 16, 22 ↗

Դիմումը ներկայացվում է e-request.am-ով՝ անձնագրի կամ նույնականացման քարտի պատճենով, 3×4 սմ չափսի լուսանկարով, բարձրագույն կրթությունը հաստատող փաստաթղթի պատճենով կամ անցումային կրթական ծրագրին մասնակցության հավաստագրով և պետական տուրքի վճարումը հաստատող փաստաթղթով։ Հայտարարությունը հրապարակվում է քննությունից առնվազն մեկ ամիս առաջ, իսկ փաստաթղթերը ներկայացնելու վերջնաժամկետը հրապարակմանը հաջորդող 15-րդ օրն է։ Քննության կարգ, կետեր 4, 7–10 ↗

Քննության կոնկրետ ամսաթիվն ու դիմելու մանրամասները ստուգեք Կադաստրի կոմիտեի պաշտոնական էջում ↗։

Որակավորման քննությունը ներառում է 100 հարց և 20 խնդիր։ Ամբողջ քննությանը հատկացվում է 180 րոպե։ Յուրաքանչյուր հարցի ճիշտ պատասխանը գնահատվում է մեկ միավորով, իսկ խնդիրների ճիշտ լուծումների համար ընդհանուր առմամբ տրվում է առավելագույնը 80 միավոր։ Քննությունը հաղթահարելու համար անհրաժեշտ է առնվազն 135 միավոր՝ հնարավոր 180-ից։

Այս փորձնական թեստը բաղկացած է 100 հարցից և չի ներառում խնդիրներ։ Փորձնական թեստի արդյունքը չի հավաստում որակավորման քննությունը հաղթահարելը։ Թեստի 180 րոպեանոց ժամաչափը համապատասխանում է որակավորման քննության ամբողջ տևողությանը։ Հարցային մասի համար առանձին ժամանակահատված սահմանված չէ։

Հարցերի աղբյուրը Կադաստրի կոմիտեի ղեկավարի 02.11.2026 թ. N 375/1-Լ հրամանով հաստատված հարցաշարն է։ Պատասխանների տարբերակները կազմված են KOMO-ի կողմից՝ ուսումնառության համար։ Դրանք պաշտոնական պատասխանների բանալի չեն։