Գնահատողի մասնագիտական որակավորման քննություն

Գնահատման գործունեության բնագավառում որակավորումը կազմակերպում և իրականացնում է Կադաստրի կոմիտեն՝ որակավորման քննությունների միջոցով։

Որակավորման քննություններին կարող են մասնակցել բարձրագույն կրթություն ունեցող ֆիզիկական անձինք։

Որակավորման քննություն անցկացվում է առնվազն մեկ անգամ՝ յուրաքանչյուր երեք ամսվա ընթացքում։ Հայտարարությունը հրապարակվում է Կադաստրի կոմիտեի պաշտոնական կայքում՝ քննությունից առնվազն մեկ ամիս առաջ։

Դիմումն ու կից փաստաթղթերը ներկայացվում են հայտարարության հրապարակումից հետո 10 աշխատանքային օրվա ընթացքում։ Անհրաժեշտ են դիմում, բարձրագույն կրթության դիպլոմի պատճեն, 3×4 սմ լուսանկար, անձը հաստատող փաստաթղթի պատճեն և պետական տուրքի վճարման անդորրագրի պատճեն։ Փաստաթղթերը կարելի է ներկայացնել էլեկտրոնային հարցումների միասնական հարթակով, անձամբ կամ լիազորված ներկայացուցչի միջոցով։

Պաշտոնական քննությունն անցկացվում է համակարգչով և ներառում է 80 առաջադրանք՝ 40 տեսական հարց և 40 մասնագիտական խնդիր։ Տեսական հարցերից յուրաքանչյուրը գնահատվում է 1 միավոր, 30 խնդիրը՝ 2-ական, իսկ 10 խնդիրը՝ 5-ական միավոր։ Տևողությունը 180 րոպե է, առավելագույն արդյունքը՝ 150 միավոր, իսկ որակավորումն անցնելու շեմը՝ 120 միավոր։

Պաշտոնական քննության սենյակ չի թույլատրվում ներս բերել կապի միջոցներ, տպագիր կամ ձեռագիր նյութեր և այլ տեխնիկական սարքեր։ Բացառություն են հաշվիչները։

Հարցի կամ պատասխանի ճշտության վերաբերյալ գրավոր բողոքը կարելի է ներկայացնել հանձնաժողովին քննության ավարտից հետո մեկ ժամվա ընթացքում։ Արդյունքները հրապարակվելուց հետո հինգ աշխատանքային օրվա ընթացքում նախատեսված է նաև բողոքարկում Կադաստրի կոմիտեի ղեկավարին։

Փորձնական թեստը կազմված է հրապարակված տեսական հարցերից և չի ներառում պաշտոնական քննության 40 գործնական խնդիրները։ Պատասխանների հիմքը Կադաստրի կոմիտեի պաշտոնական հարցաշարն է. հայտնաբերված անհամապատասխանությունները ճշտված են գործող իրավական ակտերով և նշված են տվյալ հարցի բացատրությունում։ Երեք սխալ տարբերակները կազմել է ԿՈՄՈ-ն։ Արդյունքը պաշտոնական որակավորման արդյունք չէ։

Որակավորման քննության ամբողջ տևողությունը 180 րոպե է՝ 40 տեսական հարցի և 40 մասնագիտական խնդրի համար։ Այս փորձնական թեստի ժամաչափի համար կիրառվում է նույն տևողությունը, սակայն թեստը ներառում է միայն 40 տեսական հարց։ Տեսական մասի համար առանձին պաշտոնական ժամկետ սահմանված չէ։

• Կադաստրի կոմիտե․ գնահատման որակավորման քննություններ ↗
• Գնահատման որակավորման հարցաշար և պատասխաններ ↗
• 2025 թ. օգոստոսի 18-ի N 321-Լ հրաման ↗
• ՀՀ կառավարության 2022 թ. հուլիսի 7-ի N 1044-Ն որոշում ↗
• «Գնահատման գործունեության մասին» ՀՀ օրենք՝ գործող խմբագրություն ↗
• ՀՀ կառավարության 2022 թ. օգոստոսի 24-ի N 1355-Ն որոշում ↗