Հայաստանի անշարժ գույքի շուկայի վերլուծություն: 2025թ. առաջին եռամսյակ
Համեմատած 2024 թվականի նույն ժամանակահատվածի հետ 2025 թվականի առաջին եռամսյակում Հայաստանի անշարժ գույքի շուկան անկում է ապրել: Այս հոդվածում ներկայացնում ենք Կադաստրի կոմիտեի պաշտոնական տվյալների վրա հիմնված վերլուծություն:
⬇️ 6.2% ⬇️ ընդհանուր գործարքների նվազում
2025թ. առաջին եռամսյակում Հայաստանում գրանցվել է 54,165 անշարժ գույքի գործարք, ինչը 6.2%-ով պակաս է, քան 2024թ. նույն ժամանակահատվածում (57,775): Ուշագրավ է, որ համեմատելով 2024թ. չորրորդ եռամսյակի հետ (66,253 գործարք), անկումն էլ ավելի նշանակալի է՝ 18.2%:
Գործարքների տարածքային բաշխվածության առումով Երևանը շարունակում է պահպանել առաջատար դիրքը՝ ապահովելով գործարքների 29.0%-ը: Այնուհետև հաջորդում են Կոտայքի (16.8%), Արմավիրի (8.7%), Արարատի (8.7%) և Գեղարքունիքի (7.0%) մարզերը:
Գույքի տեսակների առումով 2025թ. առաջին եռամսյակում գործարքների 40.5%-ը կազմել են հողերը, 23.7%-ը՝ բնակարանները, 20.5%-ը՝ բնակելի տները:
⬇️ 5.9% ⬇️ գործարքների նվազում Երևանում
2025 թ․ 1-ին եռամսյակում Երևան քաղաքում գրանցվել է ընդհանուր 15,714 գործարք (2024թ. 1-ին եռամսյակի 16,694 գործարքի համեմատ նվազել է 5.9%):
⬇️ 5.6% ⬇️ ժառանգության գործարքների նվազում
2025թ. առաջին եռամսյակում գրանցվել է 9,487 ժառանգության գործարք, ինչը 5.6%-ով պակաս է, քան 2024թ. նույն ժամանակահատվածում (10,053): Համեմատելով 2024թ. չորրորդ եռամսյակի հետ (12,558 գործարք), անկումն ավելի նշանակալի է՝ 24.5%:
Ժառանգության գործարքների 15.8%-ը գրանցվել է Երևանում, 19.1%-ը՝ Գյուղական բնակավայրերում, իսկ 65.1%-ը՝ մարզերի քաղաքային բնակավայրերում: Ըստ գույքի տեսակի՝ ժառանգության գործարքների 47.9%-ը կազմել են բնակելի տները:
⬇️ 1.7% ⬇️ նվիրատվության գործարքների նվազում
2025թ. առաջին եռամսյակում գրանցվել է 5,868 նվիրատվության գործարք, ինչը 1.7%-ով պակաս է, քան 2024թ. նույն ժամանակահատվածում (5,967): Համեմատելով 2024թ. չորրորդ եռամսյակի հետ (6,551 գործարք), անկումը կազմել է 10.4%:
Նվիրատվության գործարքների մոտ 26.2%-ը բաժին է ընկնում Երևանին: Հատկանշական է, որ նվիրատվության գործարքների մեջ առավել մեծ տեսակարար կշիռ ունեն բնակելի տները (50.8%) և հողերը (40.2%):
⬇️ 4.9% ⬇️ Հայաստանում առուվաճառքի գործարքների նվազում
2025թ. առաջին եռամսյակում Հայաստանում գրանցվել է 12,484 առուվաճառքի գործարք, ինչը 4.9%-ով պակաս է, քան 2024թ. նույն ժամանակահատվածում (13,131): Համեմատելով 2024թ. չորրորդ եռամսյակի հետ (16,427 գործարք), անկումը կազմել է ⬇️ 24% ⬇️:
Առուվաճառքի գործարքների 34.8%-ը գրանցվել է Երևանում: Մարզերում առաջատարներն են Կոտայքը (16.4%), Արմավիրը (9.8%) և Արարատը (9%):
Ըստ գույքի տեսակի՝ առուվաճառքի գործարքների 43.4%-ը կազմել են հողերը, 30.3%-ը՝ բնակարանները և 11.1%-ը՝ բնակելի տները:
⬆️ 8.7% ⬆️ Երևանում բնակարանների առուվաճառքի աճ
Երևանում 2025թ. առաջին եռամսյակում գրանցվել է բազմաբնակարան բնակելի շենքերի բնակարանների 2,807 առուվաճառքի գործարք, որից 1,591-ը ձեռք է բերվել կառուցապատողից: Սա կազմում է ընդհանուր բնակարանների առուվաճառքի գործարքների 57%-ը:
2024 թվականի առաջին եռամսյակում Երևանում բնակարանների առուվաճառքի 2582 գործարք էր իրականացվել։ 2025 թվականի առաջին եռամսյակում Երևանում բնակարանների առուվաճառքի 8.7% աճ է գրանցվել, սակայն 2024 թվականի վերջին եռամսյակի 3622 բնակարանների առուվաճառքների գործարքի համեմատ անկումը կազմել է 22.5%։
Վարչական շրջանների առումով, բնակարանների առուվաճառքի գործարքների առյուծի բաժինը՝ 25.4%, բաժին է ընկնում Կենտրոնին։
⬆️ 305.17% ⬆️ Աջափնյակում բնակարանների առուվաճառքի աննախադեպ աճ
2025թ. առաջին եռամսյակում համեմատած 2024թ. առաջին եռամսյակի հետ բնակարանների առուվաճառքի ամենամեծ ու զգալի աճը գրանցվել է Աջափնյակում։ Եթե 2024 թվականի առաջին եռամսյակում այս շրջանում վաճառվել էր 116 բնակարան, ապա 2025 նույն հատվածում Աջափնյակում վաճառվել է 470 բնակարան։ Աճը կազմում է 305.17%։
⬆️ 192.62% ⬆️ Կենտրոնում բնակարանների առուվաճառքի աննախադեպ աճ
2025թ. առաջին եռամսյակում համեմատած 2024թ. առաջին եռամսյակի հետ բնակարանների առուվաճառքի զգալի աճ է գրանցվել նաև Կենտրոնում։ Եթե 2024 թվականի առաջին եռամսյակում այս շրջանում վաճառվել էր 244 բնակարան, ապա 2025 նույն հատվածում Կենտրոնում վաճառվել է 714 բնակարան։ Աճը կազմում է 192.62%։
⬇️ 4.3% ⬇️ հողերի առուվաճառքի գործարքների նվազում
2025թ. առաջին եռամսյակում Հայաստանում գրանցվել է հողերի 5,418 առուվաճառքի գործարք և 2024 թվականի առաջին եռամսյակի 5,663 գործարքի համեմատ նվազել է 4.3%-ով:
⬇️ 20.6% ⬇️ վարձակալության գործարքների անկում
2025թ. առաջին եռամսյակում գրանցվել է 2,963 վարձակալության գործարք, ինչը 20.6%-ով պակաս է, քան 2024թ. նույն ժամանակահատվածում (3,733): Սակայն հետաքրքիր է, որ համեմատելով 2024թ. չորրորդ եռամսյակի հետ (2,946 գործարք), աճ է գրանցվել՝ 0.6%:
Վարձակալության գործարքների 61.1%-ը բաժին է ընկնում Երևանին: Ըստ գույքի տեսակի՝ վարձակալության գործարքների 62.8%-ը կազմել են հասարակական նշանակության շինությունները և 24.5%-ը՝ հողերը:
Երևանում վարձակալության գործարքների 74.8%-ը բաժին է ընկնում հասարակական նշանակության շինություններին: Կենտրոն վարչական շրջանում գրանցվել է վարձակալության գործարքների 33.2%-ը:
⬆️ 6.1% ⬆️ գրավադրման գործարքների աճ
2025թ. առաջին եռամսյակում գրանցվել է 6,734 գրավադրման գործարք, ինչը 6.1%-ով ավել է, քան 2024թ. նույն ժամանակահատվածում (6,348): Համեմատելով 2024թ. չորրորդ եռամսյակի հետ (9,322 գործարք), անկումը կազմել է 27.8%:
Գրավադրման գործարքների 47.9%-ը բաժին է ընկնում Երևանին: Ըստ գույքի տեսակի՝ գրավադրման գործարքների 50.0%-ը կազմել են բնակարանները, 24.3%-ը՝ բնակելի տները և 13.3%-ը՝ հողերը:
⬆️ 9.5% ⬆️ հիփոթեքային գրավադրման գործարքների աճ
2025թ. առաջին եռամսյակում գրանցվել է հիփոթեքային գրավադրման 1,722 գործարք, ինչը 9.5%-ով ավել է, քան 2024թ. նույն ժամանակահատվածում (1,573): Համեմատելով 2024թ. չորրորդ եռամսյակի հետ (2,774 գործարք), անկումը կազմել է 37.9%:
Հիփոթեքային գրավադրման գործարքների 63.5%-ը բաժին է ընկնում Երևանին: Ըստ գույքի տեսակի՝ հիփոթեքային գրավադրման գործարքների 77.1%-ը կազմել են բնակարանները և 15.0%-ը՝ բնակելի տները:
Եզրակացություն
2025թ. առաջին եռամսյակի տվյալների վերլուծությունը ցույց է տալիս, որ Հայաստանի անշարժ գույքի շուկան որոշակի կայունացման փուլում է: Թեև ընդհանուր գործարքների քանակը նվազել է 2024թ. նույն ժամանակահատվածի համեմատ, սակայն առկա են նաև դրական միտումներ, ինչպիսիք են Երևանում բնակարանների առուվաճառքի, գրավադրման և հիփոթեքային գրավադրման գործարքների աճը:
Երևանը շարունակում է մնալ անշարժ գույքի գործարքների կենտրոն, հատկապես բնակարանների առուվաճառքի առումով: Աճել է նաև կառուցապատողից գնված բնակարանների տեսակարար կշիռը, ինչը վկայում է շինարարության ակտիվության և նոր բնակարանների նկատմամբ պահանջարկի մասին:
Հողերի առուվաճառքը շարունակում է գերակշռել գյուղական բնակավայրերում, ինչը կարող է պայմանավորված լինել գյուղատնտեսական նշանակության հողերի գործարքների մեծ քանակով:
